ദില്ലി : മുന് ജനറല് സെക്രട്ടറി പ്രകാശ് കാരാട്ടിന് പാര്ട്ടി കോഡിനേറ്ററുടെ ചുമതല. പാര്ട്ടി കോണ്ഗ്രസ് വരെയുള്ള കാലത്ത് കേന്ദ്രകമ്മിറ്റിയുടെയും പി.ബിയുടെയും മേല്നോട്ട ചുമതലയാണ് കാരാട്ടിന് നല്കിയിരിക്കുന്നത്. ദില്ലിയിൽ ചേര്ന്ന കേന്ദ്ര കമ്മറ്റി യോഗത്തിലാണ് തീരുമാനം. ജനറല് സെക്രട്ടറി സീതാറാം യെച്ചൂരിയുടെ നിര്യാണത്തിന്റെ പശ്ചാത്തലത്തിലാണ് കാരാട്ടിന് ചുമതല നൽകിയിരിക്കുന്നത്
ഏപ്രിലില് മധുരയില് നടക്കുന്ന പാര്ട്ടി കോണ്ഗ്രസില് പുതിയ ജനറല് സെക്രട്ടറിയെ തെരഞ്ഞെടുക്കും. അതുവരെയുള്ള ദൈനംദിന കാര്യങ്ങളുടെയും പാര്ട്ടി കോണ്ഗ്രസിനാവശ്യമായ സംഘടനാ തയ്യാറെടുപ്പുകളുടെയും ചുമതല പി.ബി. അംഗങ്ങളുള്പ്പെട്ട താത്കാലിക സംവിധാനത്തിനായിരിക്കും. പി.ബി. അംഗങ്ങളുടെ മേല്നോട്ടച്ചുമതലയാണ് പ്രകാശ് കാരാട്ടിന് നല്കിയിരിക്കുന്നത്. പാര്ട്ടി കോണ്ഗ്രസില് അവതരിപ്പിക്കേണ്ട കരട് രാഷ്ട്രീയപ്രമേയം, സംഘടനാരേഖ എന്നിവ സംബന്ധിച്ച പ്രാരംഭചര്ച്ചകളും ഇന്നും നാളെയുമായി നടക്കുന്ന കേന്ദ്രകമ്മിറ്റിയില് ഉണ്ടാകും.
