ദില്ലി : മാനനഷ്ടക്കേസില് രണ്ടു വര്ഷത്തെ തടവുശിക്ഷയ്ക്കു വിധിക്കപ്പെട്ട കോണ്ഗ്രസ് നേതാവ് രാഹുല് ഗാന്ധി അയോഗ്യതാ ഭീഷണിയില്.ജനപ്രാതിനിധ്യ നിയമത്തിലെ വ്യവസ്ഥ പ്രകാരം പാര്ലമെന്റ് അംഗത്വം റദ്ദാവാൻ സാധ്യതയുണ്ട്.കുറ്റക്കാരനെന്നു കണ്ടെത്തിയ കോടതി വിധിക്കു സ്റ്റേ വന്നില്ലെങ്കില് രാഹുലിന്റെ എംപി സ്ഥാനവും നഷ്ടമാവും.ഇത് രാഹുലിനേറ്റ കനത്ത പ്രഹരമായി മാറിയിരിക്കുകയാണ്.രാഹുലിന്റെ കേസില് വിധി പറഞ്ഞ സൂറത്ത് ചീഫ് ജുഡീഷ്യല് മജിസ്ട്രേറ്റ് കോടതി ശിക്ഷ നടപ്പാക്കുന്നത് 30 ദിവസത്തേക്കു തടഞ്ഞിട്ടുണ്ട്. അപ്പീല് നല്കുന്നതിനായി രാഹുലിന് ജാമ്യവും അനുവദിച്ചു.
മേല്ക്കോടതി ശിക്ഷ സ്റ്റേ ചെയ്തില്ലെങ്കില് ജനപ്രാതിനിധ്യ നിയമം അനുസരിച്ച് എംപി സ്ഥാനം നഷ്ടമാവും. ആറു വര്ഷത്തേക്കു തെരഞ്ഞെടുപ്പില് മത്സരിക്കുന്ന അയോഗ്യതയും വരും.മോദി എന്ന പേരിനെക്കുറിച്ചു നടത്തിയ പരാമര്ശത്തെച്ചൊല്ലിയുള്ള മാനനഷ്ടക്കേസിലാണ് രാഹുലിനു കോടതി ശിക്ഷ വിധിച്ചത്. എല്ലാ കള്ളന്മാര്ക്കും എങ്ങനെയാണ് മോദി എന്നു പേരു വരുന്നത് എന്ന രാഹുലിന്റെ പരാമര്ശത്തിന് എതിരെ ഗുജറാത്ത് മുന് മന്ത്രിയും ബിജെപി എംഎല്എയുമായ പൂര്ണേഷ് മോദി നല്കിയ ഹര്ജിയിലാണ് വിധി.