യുവ വനിതാ ഡോക്ടറുടെ ബലാത്സംഗക്കൊല ! കൊൽക്കത്തയിൽ രാത്രിയും പ്രതിഷേധം തുടരുന്നു ! നഗരം നിശ്ചലം

കൊൽക്കത്ത : കൊല്‍ക്കത്തയില്‍ പശ്ചിമ ബംഗാൾ നിയന്ത്രണത്തിലുള്ള ആർ ജി.കാർ മെഡിക്കൽ കോളേജിലെ യുവ ‌‌‌വനിതാ ‍ഡോക്ടർ ബലാത്സംഗത്തിനിരയായി കൊല്ലപ്പെട്ട സംഭവത്തിൽ ഡോക്ടർമാരുടെ പ്രതിഷേധം രൂക്ഷമാകുന്നു. കൊൽക്കത്തയിൽ രാത്രിയിലും ഡോക്ടർമാർ പ്രതിഷേധം തുടരുകയാണ്. നൂറ് കണക്കിന് യുവാക്കൾ റോഡ് തടഞ്ഞ് നടത്തുന്ന പ്രതിഷേധത്തെത്തുടർന്ന് നഗരത്തിൽ വലിയ ഗതാഗതക്കുരുക്ക് രൂപപ്പെട്ടിട്ടുണ്ട്.

നേരത്തെ മെഡിക്കല്‍ അസോസിയേഷന്റെ അടക്കം നേതൃത്വത്തിൽ ആരോഗ്യപ്രവര്‍ത്തകര്‍ ജന്തര്‍മന്തറിൽ പ്രതിഷേധം നടത്തിയിരുന്നു. കേസില്‍ അഞ്ച് ആവശ്യങ്ങള്‍ ഉന്നയിച്ച് ഇന്ത്യന്‍ മെഡിക്കല്‍ അസോസിയേഷന്‍ പ്രധാനമന്ത്രി നരേന്ദ്ര മോദിക്ക് കത്തയക്കുകയും ചെയ്തു .
ആരോഗ്യ പ്രവര്‍ത്തകര്‍ക്കെതിരായ അതിക്രമങ്ങള്‍ തടയുന്നതിനും ആശുപത്രികളെ സുരക്ഷിത മേഖലകളായി പ്രഖ്യാപിക്കുന്നതിനും കേന്ദ്ര നിയമം കൊണ്ടുവരണമെന്നാണ് ഐഎംഎ കത്തില്‍ ആവശ്യപ്പെടുന്നത്.

അതേസമയം ഡോക്ടര്‍മാരുടെ സുരക്ഷ ഉറപ്പാക്കാന്‍ സാധ്യമായതെല്ലാം ചെയ്യുമെന്ന് കേന്ദ്ര ആരോഗ്യ മന്ത്രാലയം നേരത്തെ ഉറപ്പ് നല്‍കിയിരുന്നു. ആരോഗ്യ പ്രവര്‍ത്തകരുടെ സുരക്ഷ ഉറപ്പാക്കുന്നതിനുള്ള നിര്‍ദേശങ്ങള്‍ രൂപീകരിക്കുന്നതിനായി സമിതി രൂപികരിക്കുമെന്നും മന്ത്രാലയം വ്യക്തമാക്കി