തെരഞ്ഞെടുപ്പിന് മുന്നേ തോറ്റ ഇൻഡി മുന്നണിയുടെ ശവപ്പെട്ടിയിൽ അവസാന ആണിയും ! മധ്യപ്രദേശിൽ കമൽനാഥ് ബിജെപിയിലേക്കെന്ന് അഭ്യൂഹങ്ങൾ ! 13 ന് കോൺഗ്രസ് എംഎൽഎമാരെ അത്താഴ വിരുന്നിന് ക്ഷണിച്ച് മുൻ മുഖ്യമന്ത്രി; കോൺഗ്രസിനുണ്ടാകുന്നത് സമാനതകളില്ലാത്ത തിരിച്ചടി

ലോക്‌സഭാ തെരഞ്ഞെടുപ്പ് പടിവാതിക്കൽ എത്തി നിൽക്കെ ഇൻഡി മുന്നണിക്ക് വീണ്ടും തിരിച്ചടി. സഖ്യത്തിന്റെ കൺവീനർ സ്ഥാനത്ത് പരിഗണിക്കപ്പെട്ടിരുന്ന നിതീഷ് കുമാർ എൻഡിഎ മുന്നണിയിലേക്ക് ചേക്കേറിയത് മുതൽ സഖ്യത്തിലെ അനൈക്യം വരെ പ്രതിപക്ഷ സഖ്യത്തെ തിരിച്ചടിച്ചു. തെരഞ്ഞെടുപ്പിൽ എൻഡിഎ മുന്നണിക്ക് നാനൂറ് സീറ്റെന്ന പ്രധാനമന്ത്രി നരേന്ദ്രമോദിയുടെ ലക്ഷ്യം സാധ്യമാണെന്നും മുന്നണി വളരെ ക്ഷീണാവസ്ഥയിലാണെന്നും ജമ്മു കശ്മീർ മുൻ മുഖ്യമന്ത്രിയും പ്രതിപക്ഷ സഖ്യമായ ഇൻഡി മുന്നണിയിലെ അംഗമായ നാഷനൽ കോൺഫറൻസിന്റെ ഉപാദ്ധ്യക്ഷനുമായ ഒമർ അബ്ദുല്ല തുറന്ന് സമ്മതിച്ചത് കഴിഞ്ഞ ദിവസമാണ്.

ഇപ്പോഴിതാ മുതിർന്ന കോൺഗ്രസ് നേതാവും മധ്യപ്രദേശ് മുൻ മുഖ്യമന്ത്രിയുമായ കമൽനാഥ് ബിജെപിയിൽ ചേർന്നേക്കുമെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുകയാണ്. ഗാന്ധി കുടുംബവുമായി വളരെ അടുത്ത ബന്ധം പുലർത്തുന്ന കമൽനാഥ് പാളയം വിട്ടാൽ കോൺഗ്രസിനും ഇൻഡി മുന്നണിക്കും കനത്ത തിരിച്ചടിയായി അത് മാറും. സംസ്ഥാന നേതൃ നിരയിൽ വരുത്തിയ മാറ്റങ്ങളിൽ കമൽനാഥ്‌ അസ്വസ്ഥനായിരുന്നു.

കമൽനാഥിനു രാജ്യസഭാ സീറ്റും മകൻ നകുൽ നാഥിനു ലോക്‌സഭാ സീറ്റും ബിജെപി വാഗ്ദാനം ചെയ്‌തെന്നാണു ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. രാജ്യസഭാ സീറ്റ് ആവശ്യപ്പെട്ടു കമൽനാഥ് സോണിയഗാന്ധിയുമായി കഴിഞ്ഞദിവസം കൂടിക്കാഴ്ച നടത്തിയിരുന്നു. രാജ്യസഭാ സീറ്റ് നൽകാൻ ഹൈക്കമാൻഡിനു താൽപര്യമില്ലെന്നാണു സൂചന. ഇതോടെ അദ്ദേഹം പാർട്ടി വിട്ടേക്കുമെന്ന സൂചന അതിശക്തമാകുകയാണ്.

മധ്യപ്രദേശ് മുഖ്യമന്ത്രി മോഹൻ യാദവ്, കേന്ദ്ര ആഭ്യന്തരമന്ത്രി അമിത്ഷാ, ബിജെപി ദേശീയ അധ്യക്ഷൻ ജെ.പി.നഡ്ഡ എന്നിവരുമായി കൂടിക്കാഴ്ച നടത്തിയിരുന്നു. കമൽനാഥിന്റെയടക്കം പാർട്ടി പ്രവേശനം കൂടിക്കാഴ്ചയിൽ വിഷയമായെന്നാണ് കരുതുന്നത് . മുൻ ലോക്‌സഭാ സ്പീക്കർ സുമിത്ര മഹാജനാണ് കമൽനാഥിനെ ബിജെപിയിലേക്ക് ക്ഷണിച്ചു രംഗത്തെത്തിയത് ചർച്ചകളുടെ ആക്കം കൂട്ടിയിട്ടുണ്ട്. അന്തിമ തീരുമാനമെടുക്കുന്നതിന് മുന്നോടിയായി കമൽനാഥ് ഈ മാസം 13 ന് കോൺഗ്രസ് എംഎൽഎമാരെ അത്താഴ വിരുന്നിന് ക്ഷണിച്ചിട്ടുണ്ട്. അതേസമയം കമൽനാഥിനെ ബിജെപി സ്വീകരിക്കാനുള്ള തീരുമാനത്തിൽ മുൻ കോൺഗ്രസ് നേതാവ് ജ്യോതിരാദിത്യ സിന്ധ്യയുടെ പ്രതികരണവും ഉറ്റുനോക്കപ്പെടുന്നുണ്ട്. കമൽനാഥുമായുള്ള തർക്കത്തെ തുടർന്നായിരുന്നു സിന്ധ്യ നേരത്തേ കോൺഗ്രസ് ബന്ധം അവസാനിപ്പിച്ച് ബിജെപിയിൽ എത്തിയത്. എന്തായാലും ഇക്കാര്യത്തിൽ വരും ദിവസങ്ങളിൽ തന്നെ വ്യക്തത വന്നേക്കാം.