തിരുപ്പതി മാതൃകയിൽ ശബരിമലയും ഗുരുവായൂരും അന്താരാഷ്ട്ര നിലവാരത്തിലേക്ക്; ആത്മീയ-സാംസ്കാരിക മേഖലയ്ക്ക് പ്രതീക്ഷയേകി ബജറ്റിൽ പ്രഖ്യാപനങ്ങൾ

സംസ്ഥാനത്തെ പ്രധാന തീർത്ഥാടന കേന്ദ്രങ്ങളുടെ സമഗ്ര വികസനവും ആത്മീയ-സാംസ്കാരിക മേഖലയുടെ പുരോഗതിയും ലക്ഷ്യമിട്ട് ബജറ്റിൽ പ്രഖ്യാപനങ്ങൾ. ശബരിമല, ഗുരുവായൂർ, കൊട്ടിയൂർ, തിരുവല്ലം എന്നീ പ്രശസ്തമായ ക്ഷേത്രങ്ങളെ തിരുപ്പതി മാതൃകയിൽ അന്താരാഷ്ട്ര നിലവാരമുള്ള ദേശീയ തീർത്ഥാടന കേന്ദ്രങ്ങളാക്കി മാറ്റുമെന്ന് മുഖ്യമന്ത്രി പ്രഖ്യാപിച്ചു. ക്ഷേത്രങ്ങളുടെയും അനുബന്ധ സൗകര്യങ്ങളുടെയും നവീകരണത്തിനായി ബജറ്റിൽ പ്രത്യേക ഊന്നലാണ് നൽകിയിട്ടുള്ളത്. ഇതിന്റെ ഭാഗമായി ഈ തീർത്ഥാടന കേന്ദ്രങ്ങളോട് ചേർന്നുള്ള കാവുകളും കുളങ്ങളും ശാസ്ത്രീയമായി നവീകരിക്കുന്നതിനായി 5 കോടി രൂപ വകയിരുത്തിയിട്ടുണ്ട്. കൂടാതെ തിരുവിതാംകൂർ ദേവസ്വം ബോർഡിന് പ്രതിവർഷം നൽകേണ്ട ‘ആന്വിറ്റി’ വിഹിതം കൃത്യമായി ലഭ്യമാക്കുന്നതിനായി 5 കോടി രൂപയും ബജറ്റിൽ പ്രത്യേകം നീക്കിവെച്ചു.

മലബാർ ദേവസ്വം ബോർഡിന്റെ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും മറ്റ് ബോർഡുകൾക്ക് സമാനമായി കൂടുതൽ അധികാരങ്ങൾ നൽകുന്നതിനുമുള്ള നിർണ്ണായക തീരുമാനങ്ങളും ബജറ്റിലുണ്ട്. ഇതര ദേവസ്വം ബോർഡുകളെപ്പോലെ മലബാർ ദേവസ്വം ബോർഡിനും ശക്തമായ പ്രത്യേക ചട്ടങ്ങൾ രൂപീകരിക്കുമെന്ന് മുഖ്യമന്ത്രി അറിയിച്ചു. ആറന്മുള ഉതൃട്ടാതി വള്ളംകളിയുടെ ഭാഗമായുള്ള 52 പള്ളിയോടങ്ങൾക്ക് നിലവിൽ നൽകിവരുന്ന 10,000 രൂപയുടെ ഗ്രാൻഡ് 15,000 രൂപയായി വർധിപ്പിച്ചതാണ് സാംസ്കാരിക മേഖലയിലെ മറ്റൊരു ശ്രദ്ധേയമായ പ്രഖ്യാപനം.

ആത്മീയ-സാംസ്കാരിക രംഗത്ത് ദേശീയതലത്തിൽ ശ്രദ്ധിക്കപ്പെടുന്ന മറ്റ് ചില സുപ്രധാന പദ്ധതികളും ബജറ്റിന്റെ ഭാഗമായി പ്രഖ്യാപിച്ചിട്ടുണ്ട്. ഇതിൽ ഏറ്റവും പ്രധാനപ്പെട്ടത് നവോത്ഥാന നായകൻ ശ്രീനാരായണഗുരുവിന്റെ പ്രതിമ രാജ്യതലസ്ഥാനമായ ഡൽഹിയിൽ സ്ഥാപിക്കുന്നതിനായി 1 കോടി രൂപ അനുവദിച്ചതാണ്. ഇതിനൊപ്പം തൃശൂരിന്റെ സാംസ്കാരിക ഹൃദയമായ തേക്കിൻകാട് മൈതാനം അത്യാധുനിക രീതിയിൽ നവീകരിക്കുന്നതിനായി 10 കോടി രൂപയും ബജറ്റിൽ വകയിരുത്തിയിട്ടുണ്ട്. അടിസ്ഥാന സൗകര്യ വികസനത്തിനൊപ്പം സംസ്ഥാനത്തിന്റെ സാംസ്കാരിക പൈതൃകം കാത്തുസൂക്ഷിക്കാനും ഈ പദ്ധതികൾ സഹായിക്കുമെന്നാണ് വിലയിരുത്തപ്പെടുന്നത്.