ഓണത്തോടനുബന്ധിച്ചുള്ള പൂജകൾക്കായി ശബരിമല ശ്രീ ധർമ്മശാസ്താ ക്ഷേത്രനട സെപ്റ്റംബർ 3-ന് (ബുധനാഴ്ച ) തുറക്കും. വൈകുന്നേരം 5 മണിക്ക് തന്ത്രി കണ്ഠരര് മഹേഷ് മോഹനരുടെ മുഖ്യകാർമ്മികത്വത്തിൽ മേൽശാന്തി അരുൺകുമാർ നമ്പൂതിരി ശ്രീകോവിൽ നട തുറന്ന് ദീപം തെളിയിക്കും. തുടർന്ന് ഉപദേവതാ ക്ഷേത്രങ്ങളിലെ നടകളും തുറക്കും.
ദർശനത്തിനായി ഉത്രാട ദിനമായ സെപ്റ്റംബർ 4-ന് പുലർച്ചെ 5 മണി മുതൽ ഭക്തർക്ക് പ്രവേശനം അനുവദിക്കും. ഉത്രാടം, തിരുവോണം, അവിട്ടം എന്നീ ഓണനാളുകളിൽ സന്നിധാനത്ത് വിപുലമായ ഓണസദ്യ ഒരുക്കും. ഓരോ ദിവസത്തെ സദ്യയ്ക്കും പ്രത്യേക ചുമതലക്കാരുണ്ട്.
ഉത്രാട സദ്യ: മേൽശാന്തിയുടെ വകയായാണ് ഈ ദിവസത്തെ ഓണസദ്യ നടത്തുക.
തിരുവോണ സദ്യ: തിരുവിതാംകൂർ ദേവസ്വം ബോർഡ് ജീവനക്കാരുടെ നേതൃത്വത്തിലായിരിക്കും തിരുവോണ നാളിലെ സദ്യ.
അവിട്ട സദ്യ: സന്നിധാനത്ത് സേവനത്തിലുള്ള പോലീസ് ഉദ്യോഗസ്ഥരാണ് അവിട്ടം ദിവസത്തെ ഓണസദ്യ ഒരുക്കുന്നത്.
ഓണത്തിനോടനുബന്ധിച്ചുള്ള പൂജകൾ പൂർത്തിയാക്കി സെപ്റ്റംബർ 7-ന് (ചതയം) രാത്രി 10 മണിക്ക് നട അടയ്ക്കും. ഈ ദിവസങ്ങളിൽ ദർശനത്തിനായി വൻ ഭക്തജനത്തിരക്ക് പ്രതീക്ഷിക്കുന്നതിനാൽ, ആവശ്യമായ ക്രമീകരണങ്ങൾ ദേവസ്വം ബോർഡ് ഏർപ്പെടുത്തിയിട്ടുണ്ട്.
