ഓണം, കന്നിമാസപൂജകള്‍ക്കായി ശബരിമല ക്ഷേത്ര നട ഈ വരുന്ന വെള്ളിയാഴ്ച (13.09.2024 ) തുറക്കും. വൈകുന്നേരം അഞ്ച് മണിക്ക് തന്ത്രി കണ്ഠരര് രാജീവരുടെ സാന്നിദ്ധ്യത്തില്‍ മേല്‍ശാന്തി പി.എന്‍.മഹേഷ് നമ്പൂതിരി നട തുറന്ന് ദീപം തെളിയിക്കും. കന്നിമാസ പൂജകള്‍ക്ക് ശേഷം സെപ്തംബര്‍ 21 നാണ് നട അടയ്ക്കുക. തുടര്‍ച്ചായി ഒന്‍പതുദിവസം ഭഗവാനെ ദര്‍ശിക്കാന്‍ കഴിയുമെന്നതാണ് ഈ തീര്‍ഥാടനകാലത്തിന്റെ പ്രത്യേകത. ഓണത്തോടനുബന്ധിച്ച് ഉത്രാടം മുതല്‍ തിരുവോണത്തിന്റെ പിറ്റേന്നുവരെ വിഭവസമൃദ്ധമായ സദ്യയും ഭക്തര്‍ക്കായി ഒരുക്കിയിട്ടുണ്ട്.
13-ന് വൈകീട്ട് അഞ്ചിന് തന്ത്രിമാരായ കണ്ഠര് രാജീവരുടെയും കണ്ഠര് ബ്രഹ്‌മദത്തന്റെയും സാന്നിധ്യത്തില്‍ മേല്‍ശാന്തി മഹേഷ് നമ്പൂതിരി നടതുറക്കും. ഉത്രാടദിനമായ 14-ന് മേല്‍ശാന്തിയുടെ വകയാണ് സദ്യ. തിരുവോണത്തിന് ദേവസ്വം ഉദ്യോഗസ്ഥരും പിറ്റേന്ന് പോലീസുകാരുമാണ് സദ്യ നല്‍കുന്നത്. മൂന്നുദിവസവും ഉച്ചയ്ക്ക് സന്നിധാനത്തുള്ള മുഴുവന്‍ ഭക്തര്‍ക്കും ഇലയിട്ട് വിഭവങ്ങള്‍ വിളമ്പും.
17-നാണ് കന്നി ഒന്ന്. തുടര്‍ന്ന് നാലുനാള്‍കൂടി ദര്‍ശനസൗകര്യമുണ്ട്. 14 മുതല്‍ നടതുറന്നിരിക്കുന്ന എല്ലാദിവസവും നെയ്യഭിഷേകം നടത്താം. പടിപൂജ, സഹസ്രകലശം, കളഭാഭിഷേകം, ലക്ഷാര്‍ച്ചന, പുഷ്പാഭിഷേകം എന്നിവയും നടക്കും. പൂജകള്‍ പൂര്‍ത്തിയാക്കി 21-ന് രാത്രിയില്‍ നടയടയ്ക്കും. വെര്‍ച്വല്‍ ക്യൂ ബുക്കു ചെയ്താണ് ഭക്തർ ദർശനം നടത്തേണ്ടത്. സ്‌പോട്ട് ബുക്കിങ് സൗകര്യവുമുണ്ട്.
