സീനിയർ വനിതാ ഏകദിന ടൂർണമെന്റ്! ഹൈദരാബാദിനെ 141 റൺസിന് തകർത്ത് കേരളം

റാഞ്ചി: സീനിയർ വനിതാ ഏകദിന ടൂർണമെന്റിൽ കരുത്തരായ ഹൈദരാബാദിനെതിരെ കേരളത്തിന് തകർപ്പൻ വിജയം. ശക്തമായ ബാറ്റിംഗും കൃത്യമായ ബൗളിംഗും ഒന്നിച്ചപ്പോൾ 141 റൺസിനാണ് കേരളം ഹൈദരാബാദിനെ പരാജയപ്പെടുത്തിയത്.
ടോസ് നേടി ആദ്യം ബാറ്റ് ചെയ്ത കേരളം നിശ്ചിത 50 ഓവറിൽ ഏഴ് വിക്കറ്റ് നഷ്ടത്തിൽ 289 റൺസ് നേടി. ക്യാപ്റ്റൻ ഷാനിയും അക്ഷയയും ചേർന്ന് നൽകിയ മികച്ച തുടക്കമാണ് കേരളത്തെ വലിയ സ്കോറിലേക്ക് നയിച്ചത്. ഒന്നാം വിക്കറ്റിൽ ഇരുവരും ചേർന്ന് 147 റൺസ് കൂട്ടിച്ചേർത്തു. 62 റൺസെടുത്ത ഷാനി റണ്ണൗട്ടായി പുറത്തായപ്പോൾ, മറുവശത്ത് ഉറച്ചുനിന്ന അക്ഷയ സെഞ്ച്വറിയിൽ നിന്ന് മൂന്ന് റൺസ് അകലെ 42-ാം ഓവറിലാണ് മടങ്ങിയത്. 11 ബൗണ്ടറികളടക്കം 97 റൺസാണ് അക്ഷയ നേടിയത്.
മധ്യനിരയും അവസാന ഓവറുകളും കേരളത്തിന് ശക്തി നൽകി. പ്രണവി ചന്ദ്രൻ 26 റൺസെടുത്ത് റണ്ണൗട്ടായി. ദൃശ്യ ഐ.വി 26 പന്തുകളിൽ 37 റൺസും സജന സജീവൻ 15 പന്തുകളിൽ 29 റൺസും നേടി വേഗത്തിൽ സ്കോർ ഉയർത്തി. ഹൈദരാബാദിന് വേണ്ടി കുഞ്ചല നിതീഷ രണ്ട് വിക്കറ്റുകൾ വീഴ്ത്തി.
289 റൺസ് വിജയലക്ഷ്യവുമായി ഇറങ്ങിയ ഹൈദരാബാദിന് ഓപ്പണർമാരായ തൃഷയും സന്ധ്യ ഗോറയും മികച്ച തുടക്കം നൽകി. ഇരുവരും ചേർന്ന് ഓപ്പണിങ് വിക്കറ്റിൽ 98 റൺസ് കൂട്ടിച്ചേർത്തു. തൃഷ 52 റൺസും സന്ധ്യ 55 റൺസും നേടി പുറത്തായി. എന്നാൽ ഇതിന് ശേഷം കേരള ബൗളർമാർ പിടിമുറുക്കിയതോടെ ഹൈദരാബാദിന്റെ ബാറ്റിംഗ് തകർന്നു. വെറും 50 റൺസിനിടെ ഒൻപത് വിക്കറ്റുകൾ നഷ്ടമായ ഹൈദരാബാദ് 38 ഓവറിൽ 148 റൺസിന് ഓൾ ഔട്ടായി.
കേരളത്തിന് വേണ്ടി ക്യാപ്റ്റൻ ഷാനിയും സജന സജീവനും മൂന്ന് വിക്കറ്റുകൾ വീതം വീഴ്ത്തിയപ്പോൾ എസ്. ആശ രണ്ട് വിക്കറ്റുകൾ നേടി.