തിരുവനന്തപുരം എസ്എടി ആശുപത്രിയിൽ 3 മണിക്കൂറോളമായി വൈദ്യുതി മുടങ്ങി. സ്ത്രീകളുടെയും കുട്ടികളുടെയും അത്യാഹിത വിഭാഗം ബ്ലോക്കിലാണ് വൈദ്യുതി മുടങ്ങിയത്. രോഗികളും ബന്ധുക്കളും ആശുപത്രിയിൽ പ്രതിഷേധിക്കുകയാണ്. ഗർഭിണികളും അമ്മമാരും നവജാത ശിശുക്കളും കഴിയുന്ന ആശുപത്രിയിലെ അത്യാഹിത വിഭാഗത്തിലാണ് വൈദ്യുതി മുടങ്ങിയിരിക്കുന്നത് എന്നതിനാൽ വലിയ ആശങ്കയാണ് പടർന്നിരിക്കുന്നത്.
വൈദ്യുതി മുടങ്ങിയതിന് പിന്നാലെ ജനറേറ്ററും കേടായതാണ് പ്രതിസന്ധി കൂട്ടിയത്. പിഡബ്ല്യൂഡി ഇലക്ട്രിക്കൽ വിഭാഗം വൈദ്യുതി പുനസ്ഥാപിക്കാൻ ശ്രമം തുടരുകയാണ്. താൽക്കാലിക ജനറേറ്റർ ഉടൻ എത്തിക്കാൻ ആരോഗ്യമന്ത്രി നിർദ്ദേശം നൽകി. പ്രതിഷേധം കനത്ത സാഹചര്യത്തിൽ ആശുപത്രിയിൽ കൂടുതൽ പോലീസ് എത്തിയിട്ടുണ്ട്.
ആരോഗ്യ വകുപ്പ് മന്ത്രി വീണാ ജോര്ജ് വൈദ്യുതി മന്ത്രിയുടേയും പിഡബ്ല്യുഡി ഇലക്ട്രിക്കല് വിഭാഗത്തിന്റേയും സഹായം തേടി. അത്യാഹിത വിഭാഗത്തില് ഉടന് വൈദ്യുതി പുന:സ്ഥാപിക്കുമെന്ന് സാങ്കേതിക വിദഗ്ധര് അറിയിച്ചിട്ടുണ്ട്. ഉടന് തന്നെ താത്ക്കാലിക ജനറേറ്റര് സംവിധാനം ഒരുക്കും. കുട്ടികളുടെ വിഭാഗത്തില്, ഐസിയുവില് ഉള്പ്പെടെ പ്രശ്നമില്ലെന്നാണ് മെഡിക്കല് വിദ്യാഭ്യാസ വകുപ്പ് ജോ. ഡയറക്ടര് അറിയിച്ചിട്ടുള്ളത്.
