വടകരയിൽ വീണ്ടും എസ്എൻഡിപി നേതാവിന്റെ വീടിന് നേരെ ആക്രമണം; ജനൽ ചില്ലുകളും കാറും അക്രമികൾ അടിച്ചു തകർത്തു

കോഴിക്കോട്: കോഴിക്കോട് എസ്എൻഡിപി നേതാവിന്റെ വീടിന് നേരെ വീണ്ടും ആക്രമണം (SNDP Leader House Attacked). വടകരയിലാണ് സംഭവം. യൂണിയൻ വൈസ് പ്രസിഡന്റ് കെ.ടി ഹരിമോഹന്റെ വീടിന് നേരെയാണ് ആക്രമണം ഉണ്ടായത്. ആക്രമണത്തിൽ വീടിന്റെ ജനൽചില്ലുകൾ തകർന്നിട്ടുണ്ട്. മുറ്റത്ത് നിർത്തിയിട്ടിരുന്ന കാറിന്റെ പിൻഭാഗത്തെ ഗ്ലാസും അക്രമികൾ അടിച്ചുപൊട്ടിച്ചു.

ആക്രമണ സമയത്ത് വീട്ടുകാർ അകത്തുണ്ടായിരുന്നു. തുടർച്ചയായ നാലാം ദിവസമാണ് ഹരിമോഹന്റെ വീടിന് നേരെ ആക്രമണം ഉണ്ടാകുന്നത്. സംഭവത്തിൽ നേരത്തെ നൽകിയ പരാതികളിലൊന്നും പോലീസ് നടപടി സ്വീകരിച്ചില്ലെന്നാണ് ഉയരുന്ന ആക്ഷേപം. പോലീസ് ഇടപെടൽ ഇല്ലാത്തതാണ് ആക്രമണങ്ങൾ തുടരാൻ കാരണമെന്നും യൂണിയൻ നേതാക്കൾ പറഞ്ഞു. അതേസമയം അടുത്തിടയായി മേഖലയിൽ എസ്എൻഡിപി നേതാക്കൾക്ക് നേരെയുള്ള അക്രമങ്ങൾ വർദ്ധിച്ചുവരികയാണ്. ഇതിനുമുൻപ് എസ്എൻഡിപി യൂണിയൻ പ്രസിഡന്റ് ദാമോദരന് നേരെയും ആക്രമണം ഉണ്ടായിരുന്നു.