സ്റ്റാർട്ടപ്പ് ആവാസവ്യവസ്ഥയെ ഉത്തേജിപ്പിക്കാൻ നീക്കങ്ങളുമായി കേന്ദ്ര സർക്കാർ; രാജ്യത്തെ 150ലധികം സ്റ്റാർട്ടപ്പുകളുമായി പ്രധാനമന്ത്രിയുടെ സംവാദം ഇന്ന്

ദില്ലി: രാജ്യത്തെ 150ലധികം സ്റ്റാർട്ടപ്പുകളുമായി പ്രധാനമന്ത്രി നരേന്ദ്രമോദി ഇന്ന് സംവദിക്കും (PM Narendra Modi to Interact With Startups In India). ആസാദി കാ അമൃത് മഹോത്സവിന്റെ ഭാഗമായി ഡിപിഐഐടിയും, വാണിജ്യ-വ്യവസായ മന്ത്രാലയവുമാണ് പരിപാടികൾ സംഘടിപ്പിക്കുന്നത്. ജനുവരി 10 മുതൽ ആരംഭിച്ച പരിപാടികൾ നാളെ അവസാനിക്കും. വീഡിയോ കോൺഫറൻസിംഗ് വഴിയാണ് അദ്ദേഹം സംവദിക്കുക. എന്റർപ്രൈസ് സിസ്റ്റംസ്, ബഹിരാകാശം, ഇൻഡസ്ട്രി 4.0, സെക്യൂരിറ്റി, ഫിൻടെക്, പരിസ്ഥിതി, കൃഷി, ആരോഗ്യം തുടങ്ങിയ വിവിധ മേഖലകളിൽ നിന്നുള്ള സ്റ്റാർട്ടപ്പുകൾ വീഡിയോ കോൺഫറൻസിംഗിൽ പങ്കെടുക്കും.

സുസ്ഥിര വികസം, പ്രാദേശികം മുതൽ ആഗോളം വരെ, ഭാവിയുടെ സാങ്കേതിക വിദ്യ എന്നിങ്ങനെയുള്ള വിഷയങ്ങളെ അടിസ്ഥാനമാക്കി 150ഓളം വരുന്ന സ്റ്റാർട്ടപ്പുകളെ ആറ് വർക്കിംഗ് ഗ്രൂപ്പുകളായി തിരിച്ചിട്ടുണ്ടെന്ന് പ്രധാനമന്ത്രിയുടെ ഓഫീസ് അറിയിച്ചു. രാജ്യത്ത് മാറ്റങ്ങൾ കൊണ്ടുവരാനും, ദേശീയ ആവശ്യങ്ങൾ നിറവേറ്റാനും, സ്റ്റാർട്ടപ്പുകൾ എങ്ങിനെ ഉപകരിക്കുമെന്ന് മനസ്സിലാക്കുകയാണ് പരിപാടിയുടെ ലക്ഷ്യം. ഇന്ത്യയുടെ വളർച്ചയിൽ ഗണ്യമായ സംഭാവന നൽകാനുള്ള സ്റ്റാർട്ടപ്പുകളുടെ സാധ്യതകളിൽ വിശ്വസിക്കുന്നതായും അദ്ദേഹത്തിന്റെ ഓഫീസ് വ്യക്തമാക്കി. അതേസമയം സ്റ്റാർട്ടപ്പുകളുടെ വളർച്ചയ്ക്കും വികാസത്തിനും ഉതകുന്ന അന്തരീക്ഷം പ്രദാനം ചെയ്യുന്നതിനായി രാജ്യത്ത് കേന്ദ്ര സർക്കാർ അക്ഷീണം പ്രവർത്തിക്കുകയാണ്. ഇത് രാജ്യത്തെ സ്റ്റാർട്ടപ്പ് ആവാസവ്യവസ്ഥയിൽ വലിയ സ്വാധീനം ചെലുത്തുകയും രാജ്യത്ത് യൂണികോണുകളുടെ അമ്പരപ്പിക്കുന്ന വളർച്ചയ്ക്ക് കാരണമാവുകയും ചെയ്തെന്നാണ് റിപ്പോർട്ടുകൾ വ്യക്തമാക്കുന്നത്.