തിരുവനന്തപുരം:മാധ്യമ പ്രവർത്തകനായിരുന്ന എസ് വി പ്രദീപിന്റെ മരണം സിബിഐ അന്വേഷിക്കണം എന്നാവശ്യപ്പെട്ട് ആക്ഷൻ കൗൺസിൽ പ്രത്യക്ഷ സമര പരിപാടിയിലേക്ക്.ആദ്യ ഘട്ടം എന്ന നിലയിൽ പ്രദീപിന്റെ അമ്മ ആർ വസന്ത കുമാരി നാളെ (ബുധനാഴ്ച 20.01.21) സെക്രട്ടേറിയറ്റ് നടയിൽ രാവിലെ 10 മണി മുതൽ ഏകദിന സത്യാഗ്രഹം അനുഷ്ടിക്കും.
മുൻ മുഖ്യമന്ത്രി ഉമ്മൻചാണ്ടി എംഎൽഎ സമരം ഉദ്ഘാടനം ചെയ്യും. ഒ രാജഗോപാൽ എംഎൽഎ സമാപന സമ്മേളനം ഉദ്ഘാടനം ചെയ്യും. വിവിധ ജനപ്രതിനിധികൾ, വിവിധ രാഷ്ട്രീയ പാർട്ടി നേതാക്കൾ, മാധ്യമ പ്രവർത്തകർ, സാംസ്കാരിക നായകർ തുടങ്ങിയവർ പങ്കെടുക്കുമെന്ന് ആക്ഷൻ കൗൺസിൽ കൻവീനർ കെ എം ഷാജഹാൻ അറിയിച്ചു.
പ്രദീപിന്റെ മരണത്തിൽ സിബിഐ അന്വേഷണം വേണമെന്നാവശ്യപ്പെട്ട് നിരവധി ക്യാമ്പയിനുകളും പ്രതിഷേധങ്ങളും ലോകവ്യാപകമായി സമൂഹ മാധ്യമങ്ങളിലൂടെയും മറ്റും നടന്നുവരികയാണ്. പ്രദീപിന്റെ ഘാതകരെ എത്രയും വേഗം കണ്ടുപിടിക്കണമെന്നാണ് ഇവരുടെയെല്ലാം ആവശ്യം.സത്യം വിളിച്ചു പറയുന്നവരെ സമൂഹത്തില് നിന്ന് ഇല്ലാതാക്കുന്ന ഭീകരമായ നയമാണ് പ്രദീപിന്റെ പെട്ടെന്നുളള മരണത്തിനു പിന്നിലെന്ന് അദ്ദേഹത്തിന്റെ ഭാര്യയും സഹപ്രവര്ത്തകരുമുള്പ്പെടെ നിരവധി പേര് ചൂണ്ടിക്കാട്ടിയിരുന്നു.
ആക്ഷൻ കൗൺസിൽ കൺവീനർ കെ.എം ഷാജഹാൻ,ആക്ഷൻ കൗൺസിൽ പ്രവർത്തകരായ സന്ദീപ് വചസ്പതി, റോയ് മാത്യു, തത്വമയി എഡിറ്റർ ഇൻ ചീഫും സിഇഒയുമായ രാജേഷ് പിള്ള തുടങ്ങിയവരും എസ്.വി പ്രദീപിന്റെ സുഹൃത്തുക്കളും ബന്ധുക്കളും പൊതുപ്രവർത്തകരും സമരത്തിൽ പങ്കെടുക്കും.