ലക്നൗ: ഉത്തര്പ്രദേശ് മുഖ്യമന്ത്രി യോഗി ആദിത്യനാഥിന് നേരെ ഭീകരാക്രമണം നടക്കാന് സാദ്ധ്യതയുണ്ടെന്ന മുന്നറിയിപ്പുമായി ഉത്തര് പ്രദേശ് പൊലീസ്. അടുത്തുതന്നെ അദ്ദേഹം നടത്തുന്ന ഗോരഖ്നാഥ് ക്ഷേത്ര സന്ദര്ശനത്തിനിടെ മാദ്ധ്യമപ്രവര്ത്തകരുടെ വേഷത്തിലെത്തി ഭീകരര് അദ്ദേഹത്തെ ആക്രമിക്കാന് സാദ്ധ്യതയുണ്ടെന്നാണ് യുപി പൊലീസ് പറയുന്നത്. ഇതേക്കുറിച്ച് സുരക്ഷാ ഏജന്സികള് തങ്ങള്ക്ക് രഹസ്യ വിവരം കൈമാറിയിട്ടുണ്ടെന്നും പൊലീസ് പറയുന്നു.
ഭീകരാക്രമണം ഉണ്ടാകുമെന്ന മുന്നറിയിപ്പിന്റെ പശ്ചാത്തലത്തില് മുഖ്യമന്ത്രിയുടെ സുരക്ഷ സംസ്ഥാന പൊലീസ് ശക്തിപ്പെടുത്തിയിട്ടുണ്ട്. മുഖ്യമന്ത്രി യോഗി ആദിത്യനാഥ് പങ്കെടുക്കുന്ന ചടങ്ങുകള് റിപ്പോര്ട്ട് ചെയ്യുന്നതിനായി എത്തുന്ന മാദ്ധ്യമ പ്രവര്ത്തകര്ക്ക് ഫോട്ടോ പതിച്ച പ്രത്യേക തിരിച്ചറിയല് കാര്ഡുകള് വിതരണം ചെയ്യാനുള്ള നീക്കത്തിലാണ് ഇപ്പോള് യുപി പൊലീസ്. മുഖ്യമന്ത്രി എത്തുന്ന ഗോരഖ്പൂരിലും വന് സുരക്ഷയാണ് പൊലീസ് ഒരുക്കിയിരിക്കുന്നത്.