തിരുവനന്തപുരം: സ്പീക്കർ എ.എൻ. ഷംസീറിന്‍റെ ഗണപതി മിത്ത് ആണെന്ന പരാമർശത്തിൽ എൻഎസ്എസ് നടത്തിയ നാമജപ യാത്രയ്‌ക്കെതിരെ എടുത്ത കേസ് റദ്ദാക്കണമെന്നാവശ്യപ്പെട്ട് എൻ.എസ്.എസ് നൽകിയ ഹർജിയിൽസർക്കാരിന്റെ വിശദീകരണം തേടി ഹൈക്കോടതി. ജസ്റ്റിസ് എ.രാജാ വിജയരാഘവനാണ് ഹർജി പരിഗണിച്ചത്.വെള്ളിയാഴ്ച ഹൈക്കോടതി ഹർജി വീണ്ടും പരിഗണിക്കും.
എൻ.എസ്.എസ് വൈസ് പ്രസിഡന്‍റും താലൂക്ക് യൂനിയന്‍ പ്രസിഡന്റുമായ സംഗീത് കുമാറാണ് കന്‍റോൺമെൻ്റ് പൊലീസ് രജിസ്റ്റർ ചെയ്ത കേസിനെതിരെ കോടതിയെ സമീപിച്ചത്. കേസ് നിയമപരമായി നിലനിൽക്കില്ലെന്ന് ചൂണ്ടിക്കാട്ടിയാണ് ഹർജി. വിലക്ക് ലംഘിച്ച് ജാഥ നടത്തി, അനുമതിയില്ലാതെ വാഹനങ്ങളില്‍ മൈക്ക് സെറ്റ് പ്രവര്‍ത്തിപ്പിച്ചു, നിയമവിരുദ്ധമായി സംഘംചേരൽ, കലാപമുണ്ടാക്കൽ, പൊതുവഴി തടസ്സപ്പെടുത്തൽ, പൊലീസിന്റെ നിർദേശം പാലിക്കാതിരിക്കൽ എന്നീ കുറ്റങ്ങളാണ് പൊലീസ് ചുമത്തിയത്.
