മലപ്പുറം:നിറത്തിന്റെ പേരിൽ അധിക്ഷേപിക്കപ്പെട്ടതിൽ മനംനൊന്ത് നവവധു ആത്മഹത്യ ചെയ്ത കേസിൽ ഭർത്താവ് അറസ്റ്റിൽ. മലപ്പുറം മൊറയൂർ സ്വദേശി അബ്ദുൾ വാഹിദാണ് വിദേശത്തു നിന്നും കണ്ണൂർ വിമാനത്താവളത്തിലെത്തിൽ വന്നിറങ്ങിയപ്പോൾ അറസ്റ്റിലായത്. കഴിഞ്ഞ ചൊവ്വാഴ്ച്ചയാണ് മലപ്പുറം കൊണ്ടോട്ടിയിൽ ഷഹാന മുംതാസ് ആത്മഹത്യ ചെയ്തത്. ഷഹാനയുടെ ആത്മഹത്യയിൽ ഭര്ത്താവ് അബ്ദുള് വാഹിദിനെതിരെ കഴിഞ്ഞ ദിവസം പോലീസ് കൂടുതൽ വകുപ്പുകള് ചുമത്തിയിരുന്നു. ആത്മഹത്യാ പ്രേരണ, ഭാര്യയെ മാനസികമായി പീഡിപ്പിക്കൽ എന്നീ വകുപ്പുകളാണ് ഇയാൾക്കെതിരെ ചുമത്തിയിരിക്കുന്നത്.
ഭര്ത്താവിന്റേയും കുടുംബത്തിന്റെയും മാനസിക പീഡനമാണ് ഷഹാന മുംതാസിനെ ആത്മഹത്യയിലേക്ക് നയിച്ചതെന്ന് പെൺകുട്ടിയുടെ ബന്ധുക്കള് മൊഴി നല്കിയിരുന്നു. നിറത്തെച്ചൊല്ലി ഷഹാനയെ ഭര്ത്താവ് എപ്പോഴും കളിയാക്കിയിരുന്നു.ഭർതൃ മാതാവും സമാനമായാണ് പെരുമാറിയത്. വിവാഹ ബന്ധം വേര്പ്പെടുത്താൻ ഭര്ത്താവ് നിര്ബന്ധിച്ചതിലെ മനോവിഷമത്തിലാണ് ആത്മഹത്യയെന്ന് വീട്ടുകാരും ആരോപിച്ചു.
2024 മെയ് 27ന് ആണ് ഷഹാന മുംതാസും-മൊറയൂർ സ്വദേശി അബ്ദുൽ വാഹിദും വിവാഹിതരായത്. 20 ദിവസത്തിന് ശേഷം വാഹിദ് വിദേശത്തേക്ക് പോയി. പിന്നീടാണ് പെൺകുട്ടിയെ ഇയാൾ നിറത്തിന്റെ പേരിൽ കളിയാക്കാൻ ആരംഭിക്കുന്നത്
