ശരണംവിളികളാൽ മുഖരിതമായി സന്നിധാനം; ശബരിമല ഉത്സവത്തിന് കൊടിയേറി, ആറാട്ട് ഏപ്രിൽ ഒന്നിന്

ശബരിമല ധർമ്മശാസ്താ ക്ഷേത്രത്തിലെ ഉത്സവത്തിന് ഭക്തിനിർഭരമായ ചടങ്ങുകളോടെ കൊടിയേറി. പകൽ 11:30-നും 12-നും മധ്യേയുള്ള ശുഭമുഹൂർത്തത്തിൽ ക്ഷേത്രം തന്ത്രി കണ്ഠര് മഹേഷ് മോഹനരുടെ മുഖ്യകാർമ്മികത്വത്തിലാണ് കൊടിയേറ്റ് ചടങ്ങുകൾ നടന്നത്. വരുംദിവസങ്ങളിൽ ഉത്സവബലി, ശ്രീഭൂതബലി തുടങ്ങിയ വിശേഷാൽ ചടങ്ങുകൾ സന്നിധാനത്ത് നടക്കും.

മാർച്ച് 23 മുതൽ 31 വരെയുള്ള ദിവസങ്ങളിൽ ഉച്ചപൂജയ്ക്ക് ശേഷം ഉത്സവബലിയും അത്താഴപൂജയ്ക്ക് ശേഷം ശ്രീഭൂതബലിയും ദർശിക്കാൻ ഭക്തർക്ക് അവസരമുണ്ടാകും. ഉത്സവത്തോടനുബന്ധിച്ച് നെയ്യഭിഷേകത്തിന്റെ സമയക്രമത്തിലും മാറ്റം വരുത്തിയിട്ടുണ്ട്. മാർച്ച് 31 വരെ രാവിലെ 8:15 വരെ മാത്രമേ നെയ്യഭിഷേകം ഉണ്ടായിരിക്കുകയുള്ളൂ. ഏപ്രിൽ ഒന്നിന് ആറാട്ട് ദിവസം നെയ്യഭിഷേകം നടക്കില്ലെന്നും ദേവസ്വം അധികൃതർ അറിയിച്ചു. മാർച്ച് 31-നാണ് പള്ളിവേട്ട ചടങ്ങ് നടക്കുക.

ഉത്സവത്തിന്റെ സമാപന ചടങ്ങായ ആറാട്ട് ഏപ്രിൽ ഒന്നിന് പമ്പാനദിയിൽ നടക്കും. അന്ന് രാവിലെ 9 മണിക്ക് സന്നിധാനത്ത് നിന്ന് ആറാട്ട് ഘോഷയാത്ര പമ്പയിലേക്ക് പുറപ്പെടും. ആറാട്ടിന് ശേഷം ഭക്തർക്ക് പമ്പ ഗണപതി ക്ഷേത്രത്തിൽ ഭഗവാന് പറയിടുന്നതിനുള്ള സൗകര്യമുണ്ടായിരിക്കും. തുടർന്ന് വൈകുന്നേരത്തോടെ ആറാട്ട് ഘോഷയാത്ര തിരികെ സന്നിധാനത്തെത്തും. കൊടിയിറക്കുന്നതോടെ ഈ വർഷത്തെ ഉത്സവത്തിന് സമാപനമാകും. ഏപ്രിൽ ഒന്നിന് രാത്രി 10 മണിക്ക് നട അടയ്ക്കുന്നതോടെ ഉത്സവ ചടങ്ങുകൾ പൂർത്തിയാകും