കടുവ സർ ആളൊരു മാന്യനാണ്!വിശപ്പില്ലാത്തതിനാൽ മുന്നിൽപ്പെട്ട മാനിനെ വെറുതെ വിട്ട് കടുവ; വീഡിയോ വൈറൽ

വന്യജീവികളിൽ ഏറ്റവും മികച്ച വേട്ടക്കാരുടെ കൂട്ടത്തിലാണ് കടുവകൾ. ഒറ്റയ്ക്കാണ് വേട്ടയാടുന്നതെങ്കിലും എത്രവലിയ ഇരയെയും വേട്ടയാടി ഭക്ഷണമാക്കാനുള്ള കഴിവ് കടുവയ്ക്കുണ്ട് . അപ്പോൾ എളുപ്പത്തിൽ കീഴടക്കാൻ പാകത്തിന് ഒരു മാൻ കൺമുന്നിൽ വന്നുപെട്ടാലോ. അതിന്റെ കാര്യം കട്ടപ്പൊക എന്നതിൽ സംശയമില്ല. എന്നാൽ നമ്മുടെ മുൻധാരണകളെ തെറ്റിക്കുന്ന ഒരു ദൃശ്യമാണ് ഇപ്പോൾ സമൂഹ മാദ്ധ്യമങ്ങളിൽ പ്രചരിക്കുന്നത്.

ഇന്ത്യൻ ഫോറസ്റ്റ് സർവീസ് ഓഫീസറായ രമേശ് പാണ്ഡെ പങ്കുവച്ച ഒരു ദൃശ്യമാണ് ഇപ്പോൾ അതി വേഗം പ്രചരിക്കുന്നത്. തൊട്ടമുന്നിൽ ഒരു മാൻ എത്തിയിട്ടും അതിനെ ആക്രമിക്കാനോ ഭയപ്പെടുത്താനോ നിൽക്കാതെ സ്വന്തം കാര്യം നോക്കി ഞാനൊന്നും അറിയില്ലേ രാമനാരായണ എന്ന ഭാവത്തിൽ നീങ്ങുന്ന ഒരു കടുവയാണ് വിഡിയോയിലുള്ളത്.

ആദ്യ കാഴ്ചയിൽ മാനിനെ ആക്രമിക്കാൻ തയാറെടുക്കുകയാണ് കടുവയെന്ന് തോന്നും. മാൻ ആകട്ടെ മരവിച്ച അവസ്ഥയിൽ അതേ സ്ഥലത്ത് തന്നെ നിൽക്കുന്നു . ഏതാനും നിമിഷങ്ങൾക്കുശേഷം കടുവ കിടന്നിടത്തു നിന്നും എഴുന്നേൽക്കുന്നു . അടുത്ത നിമിഷം മാനിന്റെ മേൽ ചാടി വീഴ്ശുമെന്ന് പ്രതീക്ഷിച്ചെങ്കിലും . അങ്ങനെയൊരു മൃഗം തന്റെ മുന്നിലേയില്ലെന്ന് മട്ടിൽ വളരെ സാവധാനത്തിൽ വളരെ കൂളായി കടുവ മുന്നോട്ടു നടന്നു നീങ്ങുകയായിരുന്നു.

വിഡിയോ സമൂഹ മാദ്ധ്യമങ്ങളിൽ എത്തിയതോടെ വിശപ്പകറ്റാൻ മാത്രമേ വന്യജീവികൾ മറ്റു മൃഗങ്ങളെ ആക്രമിക്കൂ എന്നതിന് ഏറ്റവും വലിയ ഉദാഹരണമാണ് ഇതെന്നാണ് കമന്റിലൂടെ വരുന്ന പ്രതികരണങ്ങൾ. വിശപ്പ് തോന്നുകയോ പ്രകോപിതരാകുകയോ ചെയ്യാത്ത പക്ഷം കടുവകൾ മറ്റു ജീവികളെ ആക്രമിക്കാൻ മുതിരാറില്ല എന്നാണ് ഈ രംഗത്തെ വിദഗ്ദർ പറയുന്നത്.