കൊച്ചി: പെരുമ്പാവൂര് നഗരസഭാ ചെയര്പേഴ്സണ് തെരഞ്ഞെടുപ്പിന് പിന്നാലെ എല്ദോസ് കുന്നപ്പള്ളി എംഎല്എയുടെ ഓഫീസ് പൂട്ടി താക്കോലിട്ട് കെട്ടിടഉടമ. കെട്ടിട ഉടമയുടെ ഭാര്യ നഗരസഭയിലേക്ക് യുഡിഎഫ് സ്ഥാനാര്ത്ഥിയായി മത്സരിച്ച് വിജയിച്ചിരുന്നു.
ഇവരെ ചെയര്പേഴ്സണ് ആക്കണമെന്ന ആവശ്യം നടപ്പാകാതെ വന്നതോടെയാണ് എംഎല്എ ഓഫീസ് എല്ദോസ് കുന്നപ്പള്ളിക്ക് നഷ്ടമായത്. എംഎല്എ ഓഫീസിന്റെ ബോര്ഡ് ഇളക്കി മാറ്റി. ഇവിടുത്തെ വൈദ്യുതി ബന്ധവും വിച്ഛേദിച്ചിരിക്കൂകയാണ്.ഡിസംബര് മാസം ആദ്യമാണ് പെരുമ്പാവൂര് നഗരസഭയിലെ 20ാം വാര്ഡിലെ വീട്ടിലേക്ക് എല്ദോസ് കുന്നപ്പള്ളി എംഎല്എ ഓഫീസ് മാറ്റിയത്.
വാടക കരാര് എഴുതിയിരുന്നില്ല. കെട്ടിട ഉടമയുടെ ഭാര്യ ജെസി എജി 20ാം വാര്ഡിലെ കൗണ്സിലറായി തെരഞ്ഞെടുക്കപ്പെട്ടിരുന്നു. നഗരസഭാ അധ്യക്ഷ സ്ഥാനത്തേക്ക് മൂന്ന് പേര് അവകാശ വാദം ഉന്നയിച്ചു.
കൗണ്സിലര്മാരുടെ അഭിപ്രായം തേടിയ ഡിസിസി കെഎസ് സംഗീതയെ അധ്യക്ഷയാക്കി. പിന്നാലെ എംഎല്എയോട് കെട്ടിടം ഒഴിയാന് കെട്ടിട ഉടമ ആവശ്യപ്പെട്ടിരുന്നു.
ഇന്ന് രാവിലെ ജീവനക്കാര് ഓഫീസിലെത്തിയപ്പോള് എംഎല്എ ഓഫീസിന്റെ ബോര്ഡ് ഇളക്കി റോഡരികില് തള്ളിയ നിലയിലായിരുന്നു.
ഇറങ്ങിപ്പൊയ്ക്കോളൂ എന്ന നിലപാടിലേക്ക് കെട്ടിട ഉടമ മാറി. ഇന്ന് തന്നെ മറ്റൊരു കെട്ടിടത്തിലേക്ക് എംഎല്എ ഓഫീസ് മാറ്റുമെന്ന് ജീവനക്കാര് അറിയിച്ചു.
