കുരുക്കഴിയാതെ ശരണപാത;കണമല മുതൽ ഇലവുങ്കൽ വരെ ഗതാഗത കുരുക്ക്,വാഹനങ്ങളുടെ നീണ്ട നിര,ശബരിമല ഭക്തർ പ്രതിസന്ധിയിൽ

പത്തനംതിട്ട:ശബരിമല പാതയിൽ ഇന്നും വൻ ഗതാഗതകുരുക്ക്.കണമല മുതൽ ഇലവുങ്കൽ വരെയാണ് ഗതാഗത കുരുക്ക് അനുഭവപ്പെട്ടത്.വാഹനങ്ങളുടെ നീണ്ട നിരയാണ് പാതയിൽ കാണാൻ സാധിക്കുന്നത്.ശബരിമല ഭക്തർ വളഞ്ഞിരിക്കുന്ന അവസ്ഥയാണ് ഇപ്പോൾ നിലവിലുള്ളത്. തീർഥാടകർ 4 മണിക്കൂർ വരെ ഗതാഗതക്കുരുക്കിൽ അകപ്പെട്ടു.

അതേസമയം എരുമേലിയിൽ രാവിലെ 6 മുതൽ 2 മണിക്കൂർ ശബരിമല റൂട്ടിലേക്കുള്ള കെഎസ്ആർടിസി ഉൾപ്പെടെയുള്ള വാഹനങ്ങൾ പമ്പയിലേക്ക് പോകുന്നത് പൊലീസ് നിയന്ത്രിച്ചു. 2 മണിക്കൂറിനു ശേഷം ഗതാഗതക്കുരുക്ക് അൽപം കുറഞ്ഞതോടെയാണ് നിശ്ചിത ഇടവേളയിൽ എരുമേലിയിൽ നിന്ന് 100 വാഹനങ്ങൾ വീതം പൊലീസ് കടത്തി വിട്ടത്.

നിലയ്ക്കൽ പാർക്കിങ് മൈതാനത്തേക്ക് വാഹനങ്ങൾക്ക് പ്രവേശിക്കാൻ കഴിയാത്ത വിധം തിരക്ക് ആയതോടെ മോട്ടർ വാഹനവകുപ്പും പൊലീസും ചേർന്ന് റോഡിൽ വാഹനങ്ങൾ നിയന്ത്രിച്ച് ഇവിടെ നിന്ന് വാഹനങ്ങൾ തിരികെ പോകുന്ന മുറയ്ക്ക് മാത്രം വാഹനങ്ങൾ കടത്തി വിട്ടു. ഇതോടെ ഗതാഗതക്കുരുക്ക് എരുത്വാപ്പുഴ വരെ നീണ്ടു.