ദക്ഷിണേന്ത്യൻ സംസ്ഥാനമായ തമിഴ്നാട്ടിലെ രാമനാഥപുരത്തിന്റെ പ്രാന്തപ്രദേശത്തുള്ള തിരുപ്പുല്ലനിയിലെ ഹിന്ദു ക്ഷേത്രമാണ് ആദി ജഗന്നാഥ ക്ഷേത്രം, ഇത് വിഷ്ണുവിന് സമർപ്പിച്ചിരിക്കുന്നു. ശ്രീരാമൻ ഉറങ്ങാൻ പുല്ല് ഉപയോഗിച്ചിരുന്നുവെന്നും അതിനാൽ ഗ്രാമത്തിന് തിരുപ്പുല്ലനി എന്ന പേര് ലഭിച്ചുവെന്നും വിശ്വസിക്കപ്പെടുന്നു. ദ്രാവിഡ വാസ്തുവിദ്യാ ശൈലിയിൽ നിർമ്മിച്ച ഈ ക്ഷേത്രം തമിഴ് ഗ്രന്ഥങ്ങളിൽ രേഖപ്പെടുത്തിയിരിക്കുന്നു. 6-9 നൂറ്റാണ്ടുകളിലെ ആഴ്വാർ സന്യാസിമാരുടെ ആദ്യകാല മധ്യകാല തമിഴ് ഗ്രന്ഥങ്ങളിൽ ആദി ജഗന്നാഥനായും അദ്ദേഹത്തിന്റെ പത്നി ലക്ഷ്മിയായും ആരാധിക്കപ്പെടുന്ന വിഷ്ണുവിന് സമർപ്പിച്ചിരിക്കുന്ന 108 ദിവ്യദേശങ്ങളിൽ ഒന്നാണിത്.
എട്ടാം നൂറ്റാണ്ടിന്റെ അവസാനത്തിൽ മധ്യകാല ചോളന്മാരുടെയും പിന്നീട് പാണ്ഡ്യരുടെയും രാമനാട്ടിലെ സേതുപതി രാജാക്കന്മാരുടെയും സംഭാവനകളോടെയാണ് ഈ ക്ഷേത്രം നിർമ്മിച്ചതെന്ന് വിശ്വസിക്കപ്പെടുന്നു. ഹൈന്ദവ ഐതിഹ്യമനുസരിച്ച്, പുല്ലിൽ ലങ്കയിലേക്കുള്ള വഴി തേടി സമുദ്രദേവനെ ആരാധിക്കാൻ രാമൻ തപസ്സുചെയ്തതായി വിശ്വസിക്കപ്പെടുന്നു, ഈ സ്ഥലത്തിന് ദർഭശയനം എന്ന പേര് ലഭിച്ചു. രാമനാട് രാജാവ് സേതുപതിയുടെ പിൻഗാമിയുടെ നിയന്ത്രണത്തിലുള്ള രാമനാഥപുരം സമസ്താൻ ദേവസ്ഥാനത്തിന്റെ നിയന്ത്രണത്തിലുള്ള ഒരു ട്രസ്റ്റാണ് ഈ ക്ഷേത്രത്തിന്റെ പരിപാലനവും നടത്തിപ്പും ചെയ്തു വരുന്നത്. നിലവിൽ രാജരാജേശ്വരി നാച്ചിയാർ പാരമ്പര്യ ട്രസ്റ്റിയായും, സർക്കാരിന്റെ ഹിന്ദു മത- ചാരിറ്റബിൾ എൻഡോവ്മെന്റ് വകുപ്പ് കണക്കുകൾ ഓഡിറ്റ് ചെയ്യുകയും ചെയ്യുന്നു.
ഹിന്ദു ഐതിഹ്യമനുസരിച്ച്, രാമായണത്തിൽ ശ്രീരാമൻ സമുദ്രരാജനോട് ലങ്കയിലെത്താനുള്ള വഴി തെളിക്കാൻ പ്രാർത്ഥിച്ചു. സംസ്കൃതത്തിൽ ദർഭശയനം എന്ന് വിവരിക്കുന്ന കുശ പുല്ലിൽ (ദർഭ പുല്ലിൽ) കിടന്ന് അദ്ദേഹം തപസ്സു ചെയ്തു.
മറ്റൊരു ഐതിഹ്യമനുസരിച്ച്, ശ്രീരാമന്റെ പിതാവായ ദശരഥൻ വിവിധ യാഗങ്ങൾ അനുഷ്ഠിക്കുകയും പവിത്രമായ പായസം ലഭിക്കുന്നതിന് ധാരാളം തപസ്സുകൾ ചെയ്യുകയും ചെയ്തു. അദ്ദേഹം അത് തന്റെ മൂന്ന് ഭാര്യമാർക്കും തുല്യമായി സമർപ്പിച്ചു, അതിന്റെ ഫലമായി രാമൻ, ലക്ഷ്മണൻ, ഭരതൻ, ശത്രുഘ്നൻ എന്നിവർ ജനിച്ചു. ഐതിഹ്യത്തെ തുടർന്ന്, കുട്ടികളില്ലാത്ത ദമ്പതികൾ ക്ഷേത്രത്തിൽ നാഗപ്രതിഷ്ഠ (നാഗ ദൈവത്തിന്റെ പ്രതിഷ്ഠ സ്ഥാപിക്കൽ) എന്ന ആരാധന നടത്തുന്നു. അത്തരമൊരു ആരാധന നടത്തുമ്പോൾ ആദി ജഗന്നാഥൻ ശ്രീരാമനെപ്പോലെ ഒരു കുട്ടിയെ നൽകുമെന്ന് വിശ്വസിക്കപ്പെടുന്നു.
രാമന്റെ പ്രതിഷ്ഠയുള്ള നിരവധി ക്ഷേത്രങ്ങൾക്കൊപ്പം മധ്യകാല ചോള കാലഘട്ടത്തിലാണ് ഈ ക്ഷേത്രം ആരംഭിച്ചതെന്ന് വിശ്വസിക്കപ്പെടുന്നു. ചോള രാജാവായ പരാന്തക ഒന്നാമൻ ശ്രീലങ്ക കീഴടക്കിയതിന് ശേഷം സ്വയം “സംഗ്രാമ രാഘവ” എന്ന് പേരിട്ടു, അദ്ദേഹത്തിന്റെ മകൻ ആദിത്യ ഒന്നാമനെ കോതണ്ഡരാമൻ എന്ന് വിളിച്ചിരുന്നു. പിൽക്കാലത്തെ ചില പാണ്ഡ്യ രാജാക്കന്മാരും ക്ഷേത്രത്തിന് സംഭാവനകൾ നൽകിയിട്ടുണ്ട്. 1305-ൽ മാരവർമൻ സുന്ദര പാണ്ഡ്യന്റെ 37-ാം വർഷത്തിൽ നിർമ്മിച്ച ക്ഷേത്രത്തിലെ ഒരു ലിഖിതത്തിൽ ആര്യ ചക്രവർത്തി എന്ന മന്ത്രിയുടെ ഉത്തരവ് രേഖപ്പെടുത്തുന്നു. പാണ്ഡ്യ സാമ്രാജ്യത്തിന്റെ സുഹൃത്തുക്കളും രാമേശ്വരം ഭരണാധികാരികളുമായ ജാഫ്ന രാജാക്കന്മാരും ക്ഷേത്ര ഗോപുരത്തിന്റെ ചില ഭാഗങ്ങൾ നിർമ്മിച്ചതാകാമെന്ന് ചരിത്രകാരന്മാർ വിശ്വസിക്കുന്നു. മഹാബലി വനദരായ നായ്ക്കരുടെ കാലഘട്ടത്തിലെ 1518 മുതലുള്ള കേടുപാടുകൾ സംഭവിച്ച ഒരു രേഖയും 1528-ൽ സുന്ദരത്തോളടയാർ മഹാബലി വനദരായരുടെ കാലത്ത് ഉണ്ടാക്കിയ മറ്റൊന്നും ഉണ്ട്. അറബ് വ്യാപാരികൾ പാണ്ഡ്യ സാമ്രാജ്യം സന്ദർശിച്ചതായി സൂചിപ്പിക്കുന്ന ലിഖിതങ്ങൾ ക്ഷേത്രത്തിലുണ്ട്. വ്യാപാരികൾ മുത്തും കുരുമുളകും കച്ചവടം ചെയ്യുകയും പകരം അവരുടെ ആരാധനയ്ക്കായി പ്രദേശത്ത് പള്ളികൾ നിർമ്മിക്കാൻ അനുവദിക്കുകയും ചെയ്തു. കൽത്തൂണുകളുള്ള ദ്രാവിഡ വാസ്തുവിദ്യ പിന്തുടരുന്ന പള്ളികളെ കല്ലുപള്ളി എന്നാണ് വിളിച്ചിരുന്നത്. ഈ പ്രദേശത്തെ മറ്റ് വിഷ്ണു ക്ഷേത്രങ്ങൾക്കൊപ്പം വിജയനഗര കാലഘട്ടത്തിൽ നിന്നും ഈ ക്ഷേത്രത്തിന് ധാരാളം സംഭാവനകൾ ലഭിച്ചിരുന്നു.
രാമനാഥപുരത്ത് നിന്ന് 10 കിലോമീറ്റർ (6.2 മൈൽ), രാമേശ്വരത്ത് നിന്ന് 64 കിലോമീറ്റർ (40 മൈൽ) അകലെയുള്ള തിരുപ്പുല്ലനി എന്ന ഗ്രാമത്തിലാണ് ക്ഷേത്രം സ്ഥിതി ചെയ്യുന്നത്. ക്ഷേത്രത്തിന് കിഴക്കോട്ട് അഭിമുഖമായി അഞ്ച് നിലകളുള്ള രാജഗോപുരം ഉണ്ട്. ആദി ജഗന്നാഥന്റെ ശ്രീകോവിലിൽ ആദി ജഗന്നാഥൻ, ഭൂദേവി, ശ്രീദേവി എന്നിവരുടെ രൂപമാണ് ഇരിക്കുന്നത്. ആദി ജഗന്നാഥരുടെ പത്നി പത്മാസിനിയാണ്, ഒരു പ്രത്യേക ശ്രീകോവിലിൽ വസിക്കുന്നു. ശയിക്കുന്ന ഭാവത്തിൽ ദർഭശയന രാമൻ ഇവിടെയുണ്ട്. പതിമൂന്നാം നൂറ്റാണ്ടിലെ പാണ്ഡ്യ കാലഘട്ടത്തിലെ കൃഷ്ണന്റെ ഒരു ലോഹവിഗ്രഹമുണ്ട്. വിഗ്രഹം ഭഗവാൻ ഒരു പാമ്പിൽ നൃത്തം ചെയ്യുന്നതായി ഉള്ളതാണ്.
ഉത്സവകാലത്തും ദിവസേനയും ക്ഷേത്ര പൂജാരിമാർ പൂജകൾ (ആചാരങ്ങൾ) നടത്തുന്നു. തമിഴ്നാട്ടിലെ മറ്റ് വിഷ്ണു ക്ഷേത്രങ്ങളെപ്പോലെ പൂജാരിമാരും ബ്രാഹ്മണ ഉപജാതിയായ വൈഷ്ണവ സമുദായത്തിൽ പെട്ടവരാണ്. ദിവസവും ആറുനേരം ക്ഷേത്രാചാരങ്ങൾ നടത്തപ്പെടുന്നു. രാവിലെ 7ന് ഉഷത്കാലം, 8:00ന് കലശാന്തി, ഉച്ചയ്ക്ക് 12:00 ഉച്ചക്കളം, 6:00 ന് സായരക്ഷൈ, 7:00 ന് ഇരണ്ടാംകളം. രാത്രി 10.00ന് അർദ്ധ ജാമവും. ക്ഷേത്രാചാരങ്ങളിലെല്ലാം വൈഖാനസ ആഗമ ശാസ്ത്രങ്ങളും തെങ്കലൈ വൈഷ്ണവ ആചാരങ്ങളും പിന്തുടരുന്നു. ഓരോ ആചാരത്തിനും മൂന്ന് ഘട്ടങ്ങളുണ്ട്: ആദി ജഗന്നാഥനും പത്മാസിനിക്കും അലങ്കാരം , നെയ്വേതാനം (അന്നദാനം), ദീപാരാധന (വിളക്ക് തെളിക്കൽ). ആരാധനയുടെ അവസാന ഘട്ടത്തിൽ, നാഗസ്വരം (കുഴൽ വാദ്യം), തവിലും (താളവാദ്യവും) വായിക്കുന്നു, വേദങ്ങളിലെ സൂക്തങ്ങൾ ചൊല്ലുന്നു, ഭക്തന്മാർ ക്ഷേത്ര കൊടിമരത്തിന് മുന്നിൽ സാഷ്ടാംഗം പ്രണമിക്കുന്നു. ക്ഷേത്രത്തിൽ ആഴ്ചയിലൊരിക്കലും,മാസത്തിലൊരിക്കലും,രണ്ടാഴ്ചയിലൊരിക്കലും പൂജകൾ നടക്കുന്നു. ആദി ജഗന്നാഥനുള്ള പങ്കുനി ബ്രഹ്മോത്സവവും തമിഴ് മാസമായ ചിത്തിരൈയിലെ രാമ നവമി ഉത്സവവുമാണ് ക്ഷേത്രത്തിൽ ആഘോഷിക്കപ്പെടുന്ന രണ്ട് പ്രധാന ഉത്സവങ്ങൾ. ദക്ഷിണേന്ത്യയിലെ വിഷ്ണു ക്ഷേത്രങ്ങളിൽ ആഘോഷിക്കുന്ന മറ്റ് പ്രധാന ഉത്സവങ്ങളായ വൈകുണ്ഠ ഏകാദശി, കൃഷ്ണ ജയന്തി, പൊങ്കൽ, ദീപാവലി എന്നിവയും ആഘോഷിക്കപ്പെടുന്നു.
7-9 നൂറ്റാണ്ടിലെ വൈഷ്ണവ പ്രമാണമായ നാലയിര ദിവ്യപ്രബന്ധത്തിൽ തിരുമംഗൈ ആൾവാർ ഒരു കീർത്തനത്തിൽ ഈ ക്ഷേത്രംത്തെ പ്രകീർത്തിക്കുന്നു. ഗ്രന്ഥത്തിൽ പരാമർശിച്ചിരിക്കുന്ന 108 വിഷ്ണു ക്ഷേത്രങ്ങളിൽ ഒന്നായ ദിവ്യദേശം എന്നാണ് ഈ ക്ഷേത്രത്തെ തരംതിരിച്ചിരിക്കുന്നത്. തിരുമംഗൈ ആഴ്വാറിന്റെ നാലയിര ദിവ്യപ്രബന്ധത്തിലെ പെരിയ തിരുമൊഴിയിലെ 20 ശ്ലോകങ്ങളിൽ ഈ ക്ഷേത്രം പ്രതിഷ്ഠിക്കപ്പെട്ടിരിക്കുന്നു. കമ്പരാമായണം എന്ന കൃതിയിലും കമ്പർ ഈ ഇതിഹാസത്തെ വിവരിച്ചിട്ടുണ്ട്.
പ്രതിഷ്ഠ നിൽക്കുന്ന രൂപത്തിൽ, കിഴക്കോട്ടു ദർശനം.
മധുര രാമേശ്വരം റെയിൽപാതയിൽ രാമനാഥപുരം റെയിൽവേസ്റ്റേഷനിൽ നിന്നും 10 km അകലെ.
