വ്യോമാതിർത്തി ലംഘിച്ച് മൂന്ന് യുദ്ധവിമാനങ്ങൾ തായ്‌വാനിലേയ്ക്ക് പറത്തി ചൈന; പ്രതിരോധിക്കാൻ മിസൈലുകൾ വിക്ഷേപിച്ചതായി തായ്‌വാൻ

തായ്‌പേയ്: തായ്‌വാനിൽ പ്രകോപനം (China-Taiwan) തുടർന്ന് ചൈന. ചൈനയുടെ മൂന്ന് യുദ്ധവിമാനങ്ങൾ വ്യോമാതിർത്തി ലംഘിച്ച് രാജ്യത്ത് അതിക്രമിച്ച് കയറാൻ ശ്രമം നടത്തിയതായി തായ്‌വാൻ. അതിർത്തി കടന്നെത്തിയ യുദ്ധവിമാനങ്ങളെ പ്രതിരോധിക്കാൻ തായ്‌വാൻ മിസൈലുകൾ വിക്ഷേപിച്ചുവെന്നും, അതിന് മുൻപായി അവർക്ക് മുന്നറിയിപ്പ് നൽകിയതായും അധികൃതർ പറഞ്ഞു.

ചൈനീസ് ഷാൻസി-8 യുദ്ധവിമാനം, രണ്ട് ഷെൻയാങ് ജെ-16 യുദ്ധവിമാനങ്ങൾ എന്നിവയാണ് അതിർത്തി ലംഘിച്ചെത്തിയത്. ഈ മാസം ഇത് ആറാം തവണയാണ് ചൈനയുടെ ഭാഗത്ത് നിന്ന് പ്രകോപനം ഉണ്ടാകുന്നത്. കഴിഞ്ഞ ആഴ്ച ചൈനയുടെ 58 യുദ്ധവിമാനങ്ങൾ തായ്‌വാന്റെ വ്യോമ അതിർത്തി കടന്ന് പ്രകോപനം സൃഷ്ടിച്ചിരുന്നു. 36 ഫൈറ്റർ ജെറ്റുകൾ, 12 എച്ച്-6 ബോംബറുകൾ, മറ്റ് നാല് വിമാനങ്ങൾ എന്നിവയാണ് തെക്കൻ അതിർത്തി കടന്നെത്തിയത്. അതിർത്തി കടന്നതായി മുന്നറിയിപ്പ് ലഭിച്ചതോടെ പ്രതിരോധ സംവിധാനങ്ങൾ ഉപയോഗിച്ച് അവയെ തുരത്തുകയായിരുന്നുവെന്നും മന്ത്രാലയം അറിയിച്ചു. സമാധാനപരമായി മുന്നോട്ട് പോകുന്നതിന് ചൈനയുടെ നീക്കങ്ങൾ വലിയ തിരിച്ചടിയാകുമെന്ന് തായ്‌വാൻ ആരോപിച്ചു.

അതേസമയം ചൈനയ്ക്ക് മുന്നിൽ മുട്ടുമടക്കില്ലെന്ന് തായ്‌വാൻ പ്രസിഡന്റ് സായ് ഇൻ-വെൻ കഴിഞ്ഞദിവസം തുറന്നടിച്ചിരുന്നു. ദേശീയ ദിന റാലിയിലായിരുന്നു പ്രസിഡന്റിന്റെ ആഹ്വാനം. തായ്വാനുമായി ഒരാഴ്ച നീണ്ടുനിന്ന സംഘർഷത്തിനുശേഷം, സമാധാനപരമായ ഏകീകരണം യാഥാർത്ഥ്യമാക്കുമെന്ന് ചൈനീസ് പ്രസിഡന്റ് ഷി ജിൻപിംഗ് വ്യക്തമാക്കിയിരുന്നു. ഇതിനുപിന്നാലെയായിരുന്നു തായ്‌വാൻ പ്രസിഡന്റിന്റെ പ്രതികരണം. ചൈന മുന്നോട്ടുവച്ച പാത ഒരിക്കലും അംഗീകരിക്കാൻ കഴിയാത്തതാണെന്നും, മേഖലയിൽ പ്രതിരോധം കൂടുതൽ ശക്തിപ്പെടുത്തുമെന്നും പ്രസിഡന്റ് സായ് ഇംഗ്-വെൻ തുറന്നടിച്ചു. അതേസമയം തായ്‌വാൻ കടലിടുക്കിലുടനീളമുള്ള സംഘർഷങ്ങൾ ചൈന ലഘൂകരിക്കുമെന്ന് പ്രതീക്ഷിക്കുന്നുവെന്നും എന്നാൽ തായ്‌വാൻ തിടുക്കത്തിൽ ഒരു കാര്യവും മേഖലയിൽ നടത്തില്ലെന്നും ആവർത്തിച്ചു. ഇതിനിടയിലാണ് ഇപ്പോൾ വീണ്ടും ചൈനയുടെ ഭാഗത്തുനിന്നും പ്രകോപനം ഉണ്ടായിരിക്കുന്നത്.