മഹാരാഷ്ട്രയിൽ നാടകീയ നീക്കങ്ങൾ; വിമത എംഎല്‍എമാരുടെ ഭാര്യമാരെ വിളിച്ച്‌ ഉദ്ധവ് താക്കറെയുടെ ഭാര്യയുടെ നേതൃത്വത്തില്‍ അനുനയ നീക്കം, വിമതരെ അനുനയിപ്പിക്കാൻ അവസാനത്തെ അടവുമെടുത്ത് ഉദ്ധവ്

മുംബൈ: മഹാരാഷ്ട്രയില്‍ രാഷ്ട്രീയ പ്രതിസന്ധി തുടരവെ സര്‍ക്കാര്‍ താഴെ വീഴാതിരിക്കാനുള്ള എല്ലാ ശ്രമങ്ങളും നടക്കുന്നു എന്നാണ് പുറത്ത് വരുന്ന സൂചനകൾ. റിപ്പോര്‍ട്ടുകള്‍ പ്രകാരം മുഖ്യമന്ത്രി ഉദ്ധവ് താക്കറെയുടെ ഭാര്യ രശ്മി താക്കറെ ശിവസേനയിലെ വിമത എംഎല്‍എമാരുടെ ഭാര്യമാരെ ഫോണില്‍ വിളിച്ച്‌ സംസാരിക്കുന്നുണ്ട്.

ഭര്‍ത്താക്കന്‍മാരോട് സംസാരിച്ച്‌ അവരെ അനുനയിപ്പിച്ച്‌ തിരിച്ചു കൊണ്ടു വരാനാണ് രശ്മി ഭാര്യമാരോട് ആവശ്യപ്പെടുന്നത്. ചില വിമത എംഎല്‍എമാര്‍ക്ക് ഉദ്ധവ് താക്കറെ നേരിട്ട് സന്ദേശങ്ങളയക്കുന്നുണ്ടെന്നും വിവരമുണ്ട്. നിലവില്‍ ഗുവാഹട്ടിയിലെ ഹോട്ടലിലാണ് വിമത എംഎല്‍എമാരുള്ളത്.

ഉദ്ധവ് താക്കറെയും ഗുവാഹാട്ടിയിലെ ഹോട്ടലില്‍ താമസിക്കുന്ന എംഎല്‍എമാര്‍ക്ക് നിരന്തരം സന്ദേശം അയക്കുന്നുണ്ടെന്നും അടുത്ത വൃത്തങ്ങള്‍ വ്യക്തമാക്കി. അതിനിടെ ശിവസേനയുടെയും അതിന്റെ സ്ഥാപകന്‍ അന്തരിച്ച ബാലാസാഹേബ് താക്കറെയുടെയും പേര് ഉപയോഗിക്കുന്നതില്‍ നിന്ന് മറ്റേതെങ്കിലും രാഷ്ട്രീയ സംഘടനയെയോ വിഭാഗത്തെയോ തടയുന്നതിനായി തിരഞ്ഞെടുപ്പ് കമ്മീഷനെ സമീപിക്കാന്‍ മുഖ്യമന്ത്രി ഉദ്ധവ് താക്കറെ സേനാ നേതാക്കളുമായി ശനിയാഴ്ച ചേര്‍ന്ന ദേശീയ എക്‌സിക്യൂട്ടീവ് യോഗം തീരുമാനിച്ചു.