മുഖ്യമന്ത്രിയെ പ്രഖ്യാപിക്കാനാവാതെ കോൺഗ്രസിൽ അനിശ്ചിതത്വം; പടലപ്പിണക്കത്തിൽ പ്രതിസന്ധി, ഹൈക്കമാൻഡ് തീരുമാനം നീളുന്നു; പന്ത് ഇനി സോണിയയുടെ കോർട്ടിൽ

ദില്ലി : നിയമസഭാ തെരഞ്ഞെടുപ്പ് കഴിഞ്ഞ് എട്ട് ദിവസങ്ങൾ പിന്നിട്ടിട്ടും കേരളാ മുഖ്യമന്ത്രിയെ നിശ്ചയിക്കാനാവാതെ കുഴഞ്ഞ് കോൺഗ്രസ് നേതൃത്വം. ഗ്രൂപ്പ് പോരും വ്യക്തിപരമായ താൽപ്പര്യങ്ങളും മൂലം ഭരണം തുടങ്ങുന്നതിന് മുൻപേ പാർട്ടി പ്രതിസന്ധിയിലായിരിക്കുകയാണ്. മുഖ്യമന്ത്രിയെ തീരുമാനിക്കാനുള്ള ചർച്ചകളുടെ ഭാഗമായി രാഹുൽ ഗാന്ധി ഇപ്പോൾ നെഹ്‌റു കുടുംബത്തോട് അടുത്ത വൃത്തങ്ങളുടെ അഭിപ്രായം തേടുകയാണെന്നാണ് റിപ്പോർട്ടുകൾ. ഇന്ന് കേരളത്തിൽ നിന്നുള്ള മുതിർന്ന നേതാക്കളുമായി രാഹുൽ സംസാരിക്കുമെങ്കിലും അന്തിമ തീരുമാനം അപ്രാപ്യമായി തുടരുന്നത് ഘടകകക്ഷികൾക്കിടയിലും വലിയ പ്രതിഷേധത്തിന് കാരണമായിട്ടുണ്ട്.

ഹൈക്കമാൻഡിലെ പ്രമുഖർക്കിടയിലുള്ള ഭിന്നതയും തീരുമാനങ്ങൾ വൈകാൻ കാരണമാകുന്നുണ്ട്. കെ.സി. വേണുഗോപാലിനോടുള്ള വ്യക്തിപരമായ അടുപ്പം കണക്കിലെടുത്ത്, അന്തിമ തീരുമാനം സോണിയ ഗാന്ധി എടുക്കട്ടെയെന്ന നിലപാടിലാണ് കോൺഗ്രസ് അദ്ധ്യക്ഷൻ മല്ലികാർജുൻ ഖർഗെ. നിരീക്ഷകരുടെ റിപ്പോർട്ട് പ്രകാരം അൻപതിലേറെ എംഎൽഎമാരുടെ പിന്തുണയുള്ള കെ.സി. വേണുഗോപാലിനാണ് നിലവിൽ മുൻതൂക്കം. വി.ഡി. സതീശനും രമേശ് ചെന്നിത്തലയ്ക്കും ഒറ്റയക്കത്തിലുള്ള പിന്തുണ മാത്രമേയുള്ളൂവെന്നാണ് സൂചന. എന്നിരുന്നാലും, ഭൂരിപക്ഷം നോക്കി മുഖ്യമന്ത്രിയെ നിശ്ചയിക്കുന്ന കീഴ്‌വഴക്കം മറികടന്ന് മറ്റ് സമ്മർദ്ദങ്ങൾക്കും ഗ്രൂപ്പ് പോരിനും പാർട്ടി കീഴ്പ്പെടുന്നത് കോൺഗ്രസിനെ ദേശീയതലത്തിൽ തന്നെ പരിഹാസ്യരാക്കുകയാണ്.

തീരുമാനം നീളുന്നത് ഭരണരംഗത്ത് സ്തംഭനാവസ്ഥ ഉണ്ടാക്കുന്നതിനൊപ്പം ദേശീയ രാഷ്ട്രീയത്തിൽ ബിജെപി ഉൾപ്പെടെയുള്ള കക്ഷികൾക്ക് കോൺഗ്രസിനെ കടന്നാക്രമിക്കാൻ ആയുധമായിരിക്കുകയാണ്. പ്രധാനമന്ത്രിയും ശിവസേന ഷിൻഡെ വിഭാഗവും കോൺഗ്രസിന്റെ ഈ അനാസ്ഥയെ പരസ്യമായി പരിഹസിച്ചു കഴിഞ്ഞു. സംസ്ഥാനത്തെ പ്രതിഷേധങ്ങൾ തണുക്കുന്നത് കാത്തുനിൽക്കുകയാണെന്നും രാഹുൽ ഗാന്ധിയുടെ താൽപ്പര്യം വേണുഗോപാലാണെന്നും ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു. ബുധനാഴ്ചയോടെ തീരുമാനം ഉണ്ടാകുമെന്ന് പ്രതീക്ഷിക്കുന്നുണ്ടെങ്കിലും, നിർണ്ണായകമായ ഈ ഘട്ടത്തിൽ പോലും ഐക്യത്തോടെ ഒരു തീരുമാനമെടുക്കാൻ കഴിയാത്തത് കോൺഗ്രസിന്റെ സംഘടനാപരമായ പരാജയമായാണ് വിലയിരുത്തപ്പെടുന്നത്.