ഭാരതം പ്രശംസനീയം… രാജ്യങ്ങൾക്ക് കൊവിഡ് വാക്സിനുകള്‍ നൽകാനുള്ള ഇന്ത്യയുടെ നീക്കത്തെ പ്രശംസിച്ച് യുഎൻ സെക്രട്ടറി ജനറൽ

ന്യൂയോര്‍ക്ക്: ആഗോള ആരോഗ്യ പ്രതിസന്ധിയെ നേരിടാൻ രാജ്യങ്ങൾക്ക് കൊവിഡ് ഡോസുകൾ നൽകാനുള്ള ഇന്ത്യയുടെ നീക്കത്തെ പ്രശംസിച്ച് യുഎൻ സെക്രട്ടറി ജനറൽ അന്റോണിയോ ഗുട്ടറസ്. ഇന്ത്യയുടെ വാക്സിൻ ഉത്പാദന ശേഷി ലോകത്തിലെ ഏറ്റവും മികച്ച ആസ്തിയാണെന്നും അദ്ദേഹം പറഞ്ഞു. ആദ്യ ഡോസ് കൊവിഡ് വാക്സിൻ സ്വീകരിച്ച ശേഷമായിരുന്നു അന്റോണിയോ ഗുട്ടറസിന്റെ പ്രതികരണം.

ആഗോള പ്രതിരോധ കുത്തിവയ്പ്പ് സാധ്യമാകുമെന്ന് ഉറപ്പുവരുത്തുന്നതിൽ പ്രധാന പങ്ക് വഹിക്കാൻ ആവശ്യമായ എല്ലാ ഉപകരണങ്ങളും ഇന്ത്യയിലുണ്ടെന്നത് ആശ്വാസകരവും പ്രത്യാശ നല്‍കുന്നതാണെന്നും യുഎൻ സെക്രട്ടറി ജനറൽ പറഞ്ഞു. അതേസമയം “വാക്സിൻ മൈത്രി” ഡ്രൈവിൽ ഇന്ത്യ ഒന്നാം ഘട്ടത്തിൽ ഇതിനോടകം തന്നെ ഒമ്പത് രാജ്യങ്ങളിലേക്ക് 6 ദശലക്ഷം ഡോസുകൾ വിമാനം കയറ്റി അയച്ചുവെന്ന് പി.ടി.ഐയും റിപ്പോര്‍ട്ട് ചെയ്തിട്ടുണ്ട്.