ഡെറാഡൂൺ: ഉത്തരാഖണ്ഡിലെ ഉത്തരകാശി ജില്ലയിൽ തോൺസ് നദി കരകവിഞ്ഞുണ്ടായ കുത്തൊഴുക്കിൽ 20 വീടുകൾ ഒലിച്ചുപോയി. 18 പേരെ കാണാതാവുകയും ചെയ്തു. കഴിഞ്ഞ ഏതാനും ദിവസങ്ങളായി തുടരുന്ന ശക്തമായ മഴയിൽ തോൺസ് നദി കരകവിഞ്ഞ് ഒഴുകുകയാണ്. അധികൃതർ ജാഗ്രതാ നിർദേശം പുറപ്പെടുവിച്ചു.
ഐ ടി ബി പി, എൻ ഡി ആർ എഫ്, എസ് ഡി ആർ എഫ് തുടങ്ങിയ സേനകളെ രക്ഷാപ്രവർത്തനങ്ങൾക്കായി പ്രളയബാധിത പ്രദേശങ്ങളിലേക്ക് സർക്കാർ അയച്ചു. ഉത്തരകാശി ജില്ലയിലെ പ്രധാന പാതയായ ഗംഗോത്രി ദേശീയപാത മണ്ണിടിച്ചിലിനെ തുടർന്ന് അടച്ചിട്ടിരിക്കുകയാണ്. പെട്ടെന്നുള്ള വെള്ളപ്പൊക്കവും മേഘവിസ്ഫോടനങ്ങളും സംസ്ഥാനത്തിന്റെ വിവിധ ഇടങ്ങളിൽ ആളുകൾ കുടുങ്ങാൻ ഇടയാക്കി.
ഉത്തരകാശി, ചമോലി, പിതോരഘട്ട്, ഡെറാഡൂൺ, പൗരി, നൈനിറ്റാൾ ജില്ലകളിൽ വരും ദിവസങ്ങളിലും മഴ ശക്തമായി തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.