Monday, November 16, 2026

കത്വയില്‍ സേനയ്ക്കുള്ളില്‍ ഞെട്ടിക്കുന്ന വെടിവെപ്പ്. നാല് സിഐഎസ്എഫ് ജവാന്മാര്‍ സഹപ്രവര്‍ത്തകന്റെ വെടിയേറ്റു മരിച്ചു

ശ്രീനഗര്‍ : ജമ്മു കശ്മീരിലെ കത്വ ജില്ലയിലുണ്ടായ അതിദാരുണമായ സംഭവത്തില്‍ നാല് സിഐഎസ്എഫ് (CISF) ജവാന്മാര്‍ സഹപ്രവര്‍ത്തകന്റെ വെടിയേറ്റു മരിച്ചു. സൈനികര്‍ തമ്മിലുണ്ടായ വാക്കുതര്‍ക്കത്തെ തുടര്‍ന്നാണ് ഈ കൂട്ടക്കൊലപാതകം നടന്നത്. സംഭവവുമായി ബന്ധപ്പെട്ട് വെടിയുതിര്‍ത്ത ഹെഡ് കോണ്‍സ്റ്റബിളിനെ സുരക്ഷാ ഉദ്യോഗസ്ഥര്‍ കസ്റ്റഡിയിലെടുത്തു. ഇന്ന് വൈകീട്ട് 6:40-ഓടെയാണ് കത്വയിലെ ബസോളിയിലുള്ള മഷ്‌ക ഗ്രാമത്തിലെ സേവ പവര്‍ പ്രോജക്റ്റില്‍ (Sewa Hydroelectric Power Plant) വിന്യസിച്ചിരുന്ന സിഐഎസ്എഫ് 10-ാം ബറ്റാലിയന്‍ യൂണിറ്റില്‍ ഈ ഞെട്ടിക്കുന്ന സംഭവം അരങ്ങേറിയത്. ഡ്യൂട്ടിക്കിടെയുണ്ടായ പെട്ടെന്നുള്ള തര്‍ക്കമാണ് വലിയ ദുരന്തത്തില്‍ കലാശിച്ചത്.

അസിസ്റ്റന്റ് കമാന്‍ഡന്റ് അങ്കിത് കുമാര്‍ പാണ്ഡെ, സബ് ഇന്‍സ്പെക്ടര്‍ ലക്ഷ്മണ്‍ സിങ്, കോണ്‍സ്റ്റബിള്‍ റഫീഖ് അഹമ്മദ്, കോണ്‍സ്റ്റബിള്‍ സന്ദീപ് കുമാര്‍ എന്നിവരാണ് കൊല്ലപ്പെട്ടത്. പ്രതിയായ ഹെഡ് കോണ്‍സ്റ്റബിള്‍ അവധേഷ് കുമാര്‍ സിംഗ്, തന്റെ കൈവശമുണ്ടായിരുന്ന ഔദ്യോഗിക എകെ-47 തോക്ക് ഉപയോഗിച്ച് സഹപ്രവര്‍ത്തകര്‍ക്ക് നേരെ തുരുതുരെ വെടിയുതിര്‍ക്കുകയായിരുന്നു. ഏകദേശം 150 റൗണ്ട് വെടിയുണ്ടകള്‍ ഇയാളുടെ കൈവശം ഉണ്ടായിരുന്നതായി സിഐഎസ്എഫ് അധികൃതര്‍ സ്ഥിരീകരിച്ചിട്ടുണ്ട്. വെടിവെപ്പിന് ശേഷം ഭീകരാന്തരീക്ഷം സൃഷ്ടിച്ച പ്രതിയെ മറ്റ് സുരക്ഷാ ഉദ്യോഗസ്ഥര്‍ ഏറെ പണിപ്പെട്ടാണ് കീഴ്‌പെടുത്തിയത്.

ഗുരുതരമായി പരിക്കേറ്റ ജവാന്മാരെ ഉടന്‍ തന്നെ സമീപത്തുള്ള ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ആശുപത്രിയില്‍ എത്തുന്നതിന് മുന്‍പ് തന്നെ നാല് പേരുടെയും മരണം സംഭവിച്ചിരുന്നു.
സുരക്ഷാ സേനയ്ക്കുള്ളില്‍ ഇത്തരം ഒരു സംഭവം ഉണ്ടായത് വലിയ ആശങ്കയ്ക്ക് ഇടയാക്കിയിട്ടുണ്ട്. സംഭവത്തെക്കുറിച്ച് സിഐഎസ്എഫ് ഉയര്‍ന്ന തലത്തിലുള്ള അന്വേഷണത്തിന് ഉത്തരവിട്ടിട്ടുണ്ട്.

Related Articles

Latest Articles