വന്ദേ മാതരം പ്രസംഗങ്ങളില്‍ ഒതുങ്ങരുത്. ചരിത്രവും സ്വാധീനവും സമഗ്രമായി പഠിച്ച് ഗവേഷണരേഖയാക്കണമെന്ന് കേരള കേന്ദ്ര സര്‍വകലാശാലയില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍

കാസര്‍ഗോഡ്: വന്ദേ മാതരത്തിന്റെ ചരിത്രവും അതിന്റെ രചനയ്ക്ക് പിന്നിലെ സാഹചര്യങ്ങളും ദേശീയ പ്രസ്ഥാനത്തിലുണ്ടാക്കിയ സ്വാധീനവും സമഗ്രമായി പഠിച്ച് ഗവേഷണരേഖയായി പ്രസിദ്ധീകരിക്കണമെന്ന് ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ പറഞ്ഞു. ബങ്കിംചന്ദ്ര ചട്ടോപാധ്യായ വന്ദേ മാതരം രചിക്കാനിടയായ സാഹചര്യം എന്തായിരുന്നു, അദ്ദേഹത്തെ അതിന് പ്രേരിപ്പിച്ചതെന്ത്, രവീന്ദ്രനാഥ ടാഗോര്‍ വന്ദേ മാതരത്തെ ദേശീയഗാനമായി വിശേഷിപ്പിക്കാനിടയായ സാഹചര്യം എന്തായിരുന്നു?. തുടങ്ങിയ കാര്യങ്ങള്‍ ഗവേഷണത്തിലൂടെ പുതിയ തലമുറയ്ക്ക് മുന്നിലെത്തിക്കണം. പ്രസംഗങ്ങളിലൊതുങ്ങാതെ ആധികാരികമായ ഒരു രേഖയായി ഇത് തയ്യാറാക്കേണ്ടതുണ്ടെന്നും അദ്ദേഹം പറഞ്ഞു.

വന്ദേ മാതരത്തിന്റെ 150-ാം വാര്‍ഷികാഘോഷങ്ങളുടെ ഭാഗമായി കേരള കേന്ദ്ര സര്‍വകലാശാലയില്‍ സംഘടിപ്പിച്ച ദ്വിദിന ദേശീയ സെമിനാറിന്റെ സമാപനച്ചടങ്ങില്‍ സംസാരിക്കുകയായിരുന്നു ഗവര്‍ണര്‍. സാഹിത്യ അക്കാദമി, അഖില ഭാരതീയ സാഹിത്യ പരിഷത്ത്, കേരള കേന്ദ്ര സര്‍വകലാശാല എന്നിവയുടെ സഹകരണത്തോടെയാണ് സെമിനാര്‍ സംഘടിപ്പിച്ചത്. വന്ദേ മാതരത്തിനെതിരെ ഉയര്‍ന്നുവരുന്ന പ്രതിഷേധങ്ങള്‍ക്ക് പിന്നിലെ ശക്തികളെയും ആശയങ്ങളെയും കണ്ടെത്തേണ്ടതുണ്ടെന്നും ഗവര്‍ണര്‍ പറഞ്ഞു. കഴിഞ്ഞ ദിവസം ഉണ്ടായ സംഭവം ഒറ്റപ്പെട്ടതല്ല. ഡല്‍ഹി മുതല്‍ പ്രാദേശികതലം വരെ ഇത്തരം പ്രവണതകള്‍ക്ക് പിന്നില്‍ പ്രവര്‍ത്തിക്കുന്ന ശക്തികളെക്കുറിച്ച് സമൂഹം ജാഗ്രത പുലര്‍ത്തണം. കണ്ടെത്തുക മാത്രമല്ല, ഇത്തരം പ്രവണതകള്‍ അവസാനിപ്പിക്കാനുള്ള സാമൂഹിക ഇടപെടലും ഉണ്ടാകണമെന്നും അദ്ദേഹം പറഞ്ഞു.

വന്ദേ മാതരം ഒരു ഗാനം മാത്രമല്ല, രാജ്യത്തെ ഒന്നിപ്പിച്ച ദേശീയബോധത്തിന്റെ ശക്തമായ പ്രതീകമാണ്. മുഴുവന്‍ ഗാനം ആലപിക്കാതെ ‘വന്ദേ മാതരം’ എന്നു മാത്രം ഉച്ചരിച്ചാല്‍ പോലും രാജ്യത്തെ ജനങ്ങള്‍ ഒന്നാകുന്ന സാഹചര്യമുണ്ടായിരുന്നു. കൊളോണിയല്‍ ഭരണത്തിനെതിരെ രാജ്യത്തെ ഒന്നിപ്പിച്ച ഈ ദേശീയബോധമാണ് ബ്രിട്ടീഷ് ഭരണത്തിന്റെ അടിത്തറ ഇളക്കിയത്. രാജ്യം ഒന്നിച്ചാല്‍ ഇന്ത്യയില്‍ തുടരുക ദുഷ്‌കരമാകുമെന്ന് ബ്രിട്ടീഷുകാര്‍ തിരിച്ചറിഞ്ഞിരുന്നുവെന്നും ഗവര്‍ണര്‍ പറഞ്ഞു. വന്ദേ മാതരത്തിന്റെ ആറു ശ്ലോകങ്ങളാണോ, അതില്‍ രണ്ട് ശ്ലോകങ്ങള്‍ മാത്രമാണോ ആലപിക്കുന്നത് എന്ന ചര്‍ച്ചയില്‍ വിഷയം ഒതുങ്ങരുത്. അതിനു പിന്നിലെ ഭാവവും ആത്മാവും ദേശീയബോധവുമാണ് മനസ്സിലാക്കേണ്ടത്. ഒരിക്കല്‍ രാജ്യത്തെ ഒന്നിപ്പിച്ച ആ ദേശീയ ഉണര്‍വ് വീണ്ടും സൃഷ്ടിക്കേണ്ട സമയമാണിതെന്നും അദ്ദേഹം പറഞ്ഞു.

വന്ദേ മാതരത്തെക്കുറിച്ചുള്ള ഗവേഷണം പ്രസംഗങ്ങള്‍ക്കപ്പുറത്തേക്ക് പോകണം. ബങ്കിംചന്ദ്രന്റെ ജീവിതകാലത്തെ സാമൂഹിക-രാഷ്ട്രീയ സാഹചര്യങ്ങള്‍, രചനയുടെ പശ്ചാത്തലം, സ്വാതന്ത്ര്യസമരത്തില്‍ വന്ദേ മാതരം മുദ്രാവാക്യമായി മാറിയ പ്രക്രിയ, ദേശീയ പ്രസ്ഥാനത്തില്‍ അതുണ്ടാക്കിയ സ്വാധീനം എന്നിവ ശാസ്ത്രീയമായി പഠിക്കണം. അത്തരമൊരു പഠനം പുസ്തകരൂപത്തില്‍ പ്രസിദ്ധീകരിച്ച് ഭാവിതലമുറയ്ക്ക് കൈമാറുന്നത് വലിയ ദേശീയ രേഖയായിരിക്കുമെന്നും ഗവര്‍ണര്‍ പറഞ്ഞു. വന്ദേ മാതരം 1875 നവംബര്‍ 7-ന് രചിക്കപ്പെട്ടതായും പിന്നീട് ‘ആനന്ദമഠ’ത്തില്‍ ഉള്‍പ്പെടുത്തിയതായും 1896-ല്‍ രവീന്ദ്രനാഥ ടാഗോര്‍ കോണ്‍ഗ്രസ് സമ്മേളനത്തില്‍ ആലപിച്ചതായും ഔദ്യോഗിക ചരിത്രരേഖകള്‍ വ്യക്തമാക്കുന്നു.

വന്ദേ മാതരത്തിനെതിരെ ഉയരുന്ന സമീപനങ്ങളില്‍ വേദനയുണ്ടെന്നും ഗവര്‍ണര്‍ പറഞ്ഞു. വന്ദേ മാതരം ആലപിക്കേണ്ടതിന്റെ ആവശ്യകതയെ തന്നെ ചോദ്യം ചെയ്യുന്ന സമീപനങ്ങള്‍ എവിടെ നിന്നാണ് ഉണ്ടാകുന്നതെന്ന് സമൂഹം ചിന്തിക്കണം. ഇത്തരം വിഷയങ്ങള്‍ സെമിനാര്‍ ഹാളിന്റെയോ ലൈബ്രറിയുടെയോ നാലുചുവരികള്‍ക്കുള്ളില്‍ ഒതുങ്ങരുത്. അയല്‍ക്കാരുമായും സഹപ്രവര്‍ത്തകരുമായും സമൂഹത്തിലെ വിവിധ വിഭാഗങ്ങളുമായും ഇതേക്കുറിച്ച് ചര്‍ച്ച ചെയ്യണമെന്നും അദ്ദേഹം ആവശ്യപ്പെട്ടു.

രാജ്യത്തിന്റെ സ്ഥാപനങ്ങളെയും പാരമ്പര്യങ്ങളെയും ദുര്‍ബലപ്പെടുത്താനുള്ള ശ്രമങ്ങളെക്കുറിച്ച് ജാഗ്രത വേണം. വന്ദേ മാതരം മാത്രമല്ല, രാജ്യത്തിന്റെ ഐക്യത്തെയും ദേശീയ പാരമ്പര്യത്തെയും സംബന്ധിച്ച വിഷയങ്ങളില്‍ സമൂഹം കൂടുതല്‍ ജാഗ്രത പുലര്‍ത്തേണ്ടതുണ്ട്. രാജ്യത്തെ വിഭജിക്കുന്ന ചിന്തകള്‍ക്ക് ഇടം നല്‍കാതെ ‘ഏക ഭാരത്, ശ്രേഷ്ഠ ഭാരത്’ എന്ന ആശയത്തിലൂടെ മുന്നോട്ടുപോകണം. ഇന്ത്യ ഒറ്റക്കെട്ടായി നിന്നാല്‍ ആര്‍ക്കും അതിനെ വെല്ലുവിളിക്കാനാകില്ലെന്നും ഗവര്‍ണര്‍ പറഞ്ഞു.

ലോകത്തിന് നേതൃത്വം നല്‍കാനുള്ള ശേഷി ഇന്ത്യയ്ക്കുണ്ടെന്ന് ഗവര്‍ണര്‍ പറഞ്ഞു. രാജ്യത്തിന്റെ ശക്തി ലോകം തിരിച്ചറിയുന്നുണ്ട്. ഈ സാഹചര്യത്തില്‍ രാജ്യത്തിന്റെ ഐക്യമാണ് ഏറ്റവും പ്രധാനപ്പെട്ടത്. ഓരോരുത്തരും അതിന്റെ ഭാഗമാകണം. വന്ദേ മാതരത്തിന്റെ ആറു ശ്ലോകങ്ങളുടെയും അര്‍ഥം തനിക്ക് പൂര്‍ണമായി അറിയില്ലെന്നും സംസ്‌കൃതവും ബംഗാളിയും തനിക്ക് ആഴത്തില്‍ അറിയില്ലെന്നും ഗവര്‍ണര്‍ പറഞ്ഞു. എന്നാല്‍ വന്ദേ മാതരം തന്റെ മനസ്സിലും ചിന്തയിലും ഹൃദയത്തിലും സൃഷ്ടിച്ച ദേശീയബോധത്തിന് അതിരുകളില്ല. ആ വികാരം ആര്‍ക്കും ഇല്ലാതാക്കാനാകില്ല.

ഭാവിയില്‍ തന്റെ മക്കള്‍ ഈ കാലഘട്ടത്തെക്കുറിച്ച് ചോദിക്കുമ്പോള്‍, വീട്ടിലിരുന്ന് എല്ലാം നോക്കിക്കണ്ട ഒരാളായിരുന്നില്ലെന്നും ഈ മുന്നേറ്റത്തിന്റെ ഭാഗമായിരുന്നുവെന്നും അഭിമാനത്തോടെ പറയാന്‍ കഴിയണം. വന്ദേ മാതരം നല്‍കുന്ന സന്ദേശം അതാണ്. ദേശീയബോധത്തിന്റെ ഈ മുന്നേറ്റത്തില്‍ എല്ലാവരും പങ്കാളികളാകണമെന്നും ഗവര്‍ണര്‍ പറഞ്ഞു.