ഖുറേഷി അബ്രാം സംവിധായകന് നല്‍കിയ സണ്‍ഗ്ലാസിന്റെ വിലയറിയുമോ? ഇതാണ് ഇന്നലെ മുതല്‍ സോഷ്യല്‍മീഡിയ ആകെ ചര്‍ച്ച. ഡീറ്റയുടെ ഈ സണ്‍ഗ്ലാസിന് എന്ത് വില വരുമെന്ന് തെരഞ്ഞുകൊണ്ടിരിക്കുകയാണ് ആളുകള്‍. കാര്യം മറ്റൊന്നുമല്ല. മോഹന്‍ലാല്‍ പൃഥ്വിരാജിന് ഒരു സണ്‍ഗ്ലാസ് സമ്മാനമായി നല്‍കി. അതാണ് ഇത്രയും വലിയ പുകിലുകളുണ്ടാക്കിയത്. പൃഥ്വിരാജ് അത് സോഷ്യല്‍മീഡിയയില്‍ പങ്കുവെക്കുകയും ചെയ്തു.
ലൂസിഫറിലെ മോഹന്‍ലാല്‍ കഥാപാത്രത്തിന്റെ പേരാണ് ഖുറേഷി അബ്രാം. ഈ പേര് ഒരിക്കല്‍ കൂടി കടമെടുത്താണ് പൃഥ്വിരാജ് ലാലേട്ടന്‍ നല്‍കിയ സമ്മാനത്തിന് നന്ദി പറഞ്ഞത്.പൃഥ്വിരാജിന്റെ സണ്‍ഗ്ലാസ് പ്രേമം മോളിവുഡില്‍ എല്ലാവര്‍ക്കും അറിയുന്ന രഹസ്യമാണ്. അതുകൊണ്ട് തന്നെ ലാലേട്ടന്റെ ഈ ചെറിയ വലിയ സമ്മാനം അദ്ദേഹത്തെ വളരെ സന്തുഷ്ടനാക്കിയിട്ടുണ്ട്.
പൃഥ്വിരാജ്-മോഹന്‍ലാല്‍ കൂട്ടുക്കെട്ടിലൊരുങ്ങുന്ന രണ്ടാമത്തെ ചിത്രം ബ്രോ ഡാഡിയുടെ സെറ്റില്‍വെച്ചാണ് ഈ സമ്മാനം ലാലേട്ടന്‍ നല്‍കിയത്.അദ്ദേഹത്തിന്റെ സോഷ്യല്‍മീഡിയ പോസ്റ്റ് കണ്ട ആരാധകരൊക്കെ ഡീറ്റയുടെ ലക്ഷങ്ങള്‍ വിലവരുന്ന സണ്‍ഗ്ലാസിന്റെ യഥാര്‍ത്ഥ വില എന്തായിരിക്കുമെന്നാണ് തെരഞ്ഞുകൊണ്ടിരുന്നത്. കമ്പനിയുടെ വെബ്‌സൈറ്റിലും ഇന്നലെ വില തിരയലുകാരുടെ ബഹളമായിരുന്നു.
