ഷൊര്‍ണൂര്‍: കാട്ടില്‍ കയറി മുള്ളന്‍പന്നിയെ വെടിവെച്ച്‌ കൊന്ന കേസിൽ അഞ്ച് യുവാക്കൾ അറസ്റ്റിൽ. ചളവറ പഞ്ചായത്തിലെ ചെമ്പരത്തി മലയില്‍ നായാട്ട് നടത്തിയ അഞ്ച് യുവാക്കളെയാണ് വനം വകുപ്പ് അധികൃതര്‍ പിടികൂടിയത്. രണ്ട് തോക്ക്, മുള്ളന്‍പന്നിയുടെ ജഡം, ജീപ്പ് എന്നിവ പിടികൂടിയിട്ടുണ്ട്.
പെരിന്തല്‍മണ്ണ ആനമങ്ങാട് സ്വദേശിയായ ചോലക്കല്‍തൊടി അഷ്റഫ് അലി (41), ആലിപ്പറമ്പ് വാഴേങ്കട ചെമ്മംകുഴി മുഹമ്മദ് സാജിദ് (30), താഴേക്കോട് ചോലക്കല്‍തൊടി ഹൈദരാലി (41), താഴേക്കോട് ആനിക്കാട്ടില്‍ മുഹമ്മദ് (41), തൃക്കടീരി കുറ്റിക്കോട് വളയങ്ങാട്ടില്‍ മുഹമ്മദ് ഇഖ്ബാല്‍ (22) എന്നിവരാണ് അറസ്റ്റിലായത്.
ഇവര്‍ പലതവണ ഇവിടെയെത്തി നായാട്ട് നടത്തിയിട്ടുണ്ടെന്ന് വനം വകുപ്പ് അധികൃതര്‍ പറഞ്ഞു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്ത് ജയിലിലേക്ക് അയച്ചു.
