പാകിസ്ഥാനിൽ പ്രതിഷേധവുമായി സ്ത്രീകളുൾപ്പെടെ തെരുവിൽ; കൊടിയ പീഡനങ്ങൾ നേരിടുന്നുവെന്ന് ആക്ഷേപം; പ്രതിഷേധം ഇസ്ലാമിക വിരുദ്ധമെന്ന് തീവ്ര ഇസ്ലാമിസ്റ്റുകൾ

കാറാച്ചി: പാകിസ്ഥാനിൽ പ്രതിഷേധവുമായി സ്ത്രീകളുൾപ്പെടെ തെരുവിലിറങ്ങിയതായി (Women Protest In Pakistan)റിപ്പോർട്ട്. ന്യൂനപക്ഷ സ്ത്രീ സമൂഹങ്ങൾക്ക് നേരെ അക്രമം തുടരുന്ന സാഹചര്യത്തിലാണ് ഇസ്ലാമിക മതവിഭാഗത്തിലെ സ്ത്രീകളും വൻ പ്രതിഷേധവുമായി രംഗത്തെത്തിയത്. വീട്ടിലും പുറത്തും ഒരു പോലെ അവഹേളനവും പീഡനുമാണ് സ്ത്രീസമൂഹം അനുഭവിക്കുന്നതെന്ന് ഉറക്കെ പറഞ്ഞുകൊണ്ടാണ് നിരവധി നഗരങ്ങളിൽ പ്രതിഷേധം നടന്നത്.

ഇതിനിടെ പാകിസ്ഥാനിലെ സ്ത്രീ പ്രതിഷേധം ഇസ്ലാമിക വിരുദ്ധമാണെന്ന് ആരോപിച്ച് നിരവധി സംഘടനകളും ഭീഷണിയുമായി രംഗത്തെത്തി. സ്ത്രീകൾ പ്രതിഷേധിക്കുന്നതും തെരുവിലിറങ്ങുന്നതും ഇസ്ലാമിക സംസ്‌കാരത്തിന്റെ ഭാഗമല്ല. സ്ത്രീകളെ സംരക്ഷിക്കാൻ ഭരണകൂടം എല്ലാ സംവിധാനങ്ങളും നടപ്പിലാക്കിയിട്ടുണ്ടെന്നും പ്രതിഷേധം തണുപ്പിക്കാൻ ഇസ്ലാമിക സംഘടനയായ ജെയുഐ-എഫ് നേതാവ് അബ്ദുൾ മജീദ് പ്രസ്താവിച്ചു.

2018ന് ശേഷം ഇത് രണ്ടാം തവണയാണ് ഭരണകൂടത്തിനെതിരെ സ്ത്രീകൾ ഒന്നടങ്കം രംഗത്ത് വരുന്നത്. ഗാർഹിക പീഡനവും മതപീഡനവും വർദ്ധിച്ചുവരുന്നതാണ് സ്ത്രീകളെ ഒന്നടങ്കം തെരുവിലറക്കിയിട്ടുള്ളത്. കോവിഡ് കാലത്ത് പീഡനം വർദ്ധിച്ചെന്നും തൊഴിൽ നഷ്ടപ്പെട്ട പുരുഷന്മാർ സ്ത്രീകളെ നരകയാതനയിലേക്ക് തള്ളിവിടുകയാണെന്നും പ്രതിഷേധക്കാർ ആരോപിക്കുന്നു. അതേസമയം കൊടിയ പീഡനങ്ങളാണ് രാജ്യത്ത് സ്ത്രീകൾ നേരിട്ടുകൊണ്ടിരിക്കുന്നതെന്നാണ് റിപ്പോർട്ടുകൾ.