കറാച്ചി: പാകിസ്ഥാനിൽ മതനിന്ദയുടെ പേരിൽ കൊടുംക്രൂരത. ഖുറാനെ അവഹേളിച്ചെന്നാരോപിച്ച് മധ്യവയസ്കനെ കല്ലെറിഞ്ഞ് കൊന്ന്, മൃതദേഹം മരത്തിൽ കെട്ടിത്തൂക്കി(Pakistan mob lynches man over blasphemy allegation). പഞ്ചാബ് പ്രവിശ്യയിലെ ഖനേവാൾ ജില്ലയിലെ ജംഗിൾ ദേരാ ഗ്രാമത്തിലാണ് സംഭവം. മധ്യവയസ്കനെ മതഭ്രാന്ത് പിടിച്ച ജനക്കൂട്ടം കല്ലെറിഞ്ഞ് കൊല്ലുകയായിരുന്നു.
ഖുറാനിലെ ഏതാനും പേജുകൾ ഇയാൾ കീറി കത്തിച്ചെന്നാണ് ഇയാൾക്കെതിരെയുള്ള ആരോപണം. വിവരമറഞ്ഞ നൂറുകണക്കിന് പേർ ചേർന്ന് ഇയാളെ ക്രൂരമായി കൊലപ്പെടുത്തുകയായിരുന്നു. ശേഷം, ഇയാളുടെ മൃതദേഹം സമീപത്തെ മരത്തിൽ കെട്ടിത്തൂക്കി. എന്നാൽ താൻ നിരപരാധിയാണെന്നും യാതൊരു കുറ്റവും ചെയ്തില്ലെന്നും മധ്യവയസ്കൻ ജനക്കൂട്ടത്തോട് അപേക്ഷിച്ചെങ്കിലും ആരും കേൾക്കാൻ തയാറായില്ലെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
അതേസമയം ഇയാളെ കല്ലെറിഞ്ഞ് കൊല്ലുന്നതിന് മുന്നേ പോലീസ് സംഘം സ്ഥലത്തെത്തിയിരുന്നു. എന്നാൽ, ഇയാളെ പൊലീസിന്റെ പക്കൽ നിന്ന് ജനക്കൂട്ടം ബലമായി പിടിച്ചെടുക്കുകയും ആക്രമിക്കുകയുമായിരുന്നു. ഇരുമ്പ് ദണ്ഡുകളും വടികളും കോടാലി പോലുള്ള ആയുധങ്ങളുമുപയോഗിച്ചാണ് ആള്ക്കൂട്ടം മധ്യവയസ്കനെ ആക്രമിച്ചത്. മതനിന്ദയുടെ പേരിൽ പാകിസ്ഥാനിൽ ജനക്കൂട്ടം നടത്തുന്ന കൊലപാതകം വർദ്ധിക്കുകയാണ്. ഇക്കഴിഞ്ഞ ഡിസംബര് ആദ്യവാരം പാകിസ്ഥാനിലെ സിയാല്കോട്ടില് ഫാക്ടറിയില് മാനേജരായിരുന്ന ശ്രീലങ്കന് പൗരനെ സമാനരീതിയില് ദൈവനിന്ദ ആരോപിച്ച് ആള്ക്കൂട്ടം ആക്രമിച്ച് കൊലപ്പെടുത്തിയിരുന്നു. തീവ്രവലത് സംഘടനയായ തെഹ്രീക്-ഇ-ലബ്ബെയ്ക് പാകിസ്ഥാനിലെ (ടി.എല്.പി) അംഗങ്ങളടങ്ങിയ സംഘമായിരുന്നു പ്രിയന്ത കുമാര ദിയവദന എന്ന ശ്രീലങ്കന് പൗരനെ കൊലപ്പെടുത്തിയത്.

