ന്യൂഡൽഹി: വയറ്റിനുള്ളിൽ 181 കൊക്കെയ്ൻ ക്യാപ്സ്യൂളുകൾ ഒളിപ്പിച്ച രണ്ട് വിദേശ വനിതകൾ പിടിയിൽ. ഉഗാണ്ടയിൽ നിന്നെത്തിയ വനിതകളാണ് ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ നിന്നും കസ്റ്റംസിന്റെ പിടിയിൽ ആയത്.
വനിതകളുടെ വയറ്റിനുള്ളിൽ നിന്നും കണ്ടെത്തിയ കൊക്കെയ്ൻ ക്യാപ്സ്യൂളിന് വിപണിയിൽ 28 കോടി രൂപ വിലമതിക്കുമെന്നാണ് വിവരം. അതേസമയം രണ്ട് വനിതകളും വന്നത് ഒരേ വിമാനത്തിലാണെങ്കിലും പരസ്പരം അറിയുന്നവരെല്ലെന്ന് പോലീസ് വ്യക്തമാക്കി.
കഴിഞ്ഞ ദിവസവും സമാന സാഹചര്യത്തിൽ ഉഗാണ്ടയിൽ നിന്നുള്ള യുവതി പിടിയിലായിരുന്നു. ഡൽഹിയിലെത്തിയ യുവതിയുടെ സംശയാസ്പദമായ പെരുമാറ്റം കണ്ട് പരിശോധന നടത്തിയപ്പോഴാണ് വയറ്റിനുള്ളിൽ നിന്നും കൊക്കെയ്ൻ അടങ്ങിയ 80 ക്യാപ്സ്യൂളുകൾ കണ്ടെത്തിയത്. അന്താരാഷ്ട്ര വിപണിയിൽ 14 കോടി രൂപ വില വരുന്ന മയക്കുമരുന്നാണ് ആണിത്.