കൊല്ലം: പോലീസിന്റെ നേതൃത്വത്തിൽ ഒരു സംഘം യുവാക്കൾ ചേർന്ന് വീട്ടില് കയറി പതിനാറുകാരനെ മര്ദിച്ചതായി പരാതി. ഫെബ്രുവരി 27 നു പുലര്ച്ചെ രണ്ടേമുക്കാലോടെയാണ് സംഭവം. ചവറ സ്വദേശി അദന് ഷായാണ് മർദനത്തിനിരയായത്.
തെക്കുംഭാഗം സ്റ്റേഷനിലെ മൂന്ന് പൊലീസുകാരും സമീപവാസികളായ ഒരു സംഘം യുവാക്കളും ചേർന്നാണ് ആക്രമിച്ചതെന്നും, അര്ധരാത്രി ജനല്ച്ചില്ലുകള് പൊട്ടിക്കുകയും കതക് ചവിട്ടിത്തുറന്ന് അകത്ത് പ്രവേശിക്കുകയായിരുന്നെന്നും അദന് ഷാ പരാതിയിൽ പറയുന്നു.
പൊലീസ് കിടക്ക വിരി ഉപയോഗിച്ച് കൈകള് പുറകോട്ട് കെട്ടി യുവാക്കള്ക്ക് മുന്നിലേക്ക് എറിഞ്ഞു കൊടുക്കുകയായിരുന്നു. തുടർന്ന് യുവാക്കള് ചേര്ന്ന് മര്ദിക്കുകയുമായിരുന്നു. ഇതേതുടർന്ന് പതിനാറുകാരന്റെ പുറത്തും നെഞ്ചിലും മര്ദനമേറ്റ പാടുണ്ട്. മാത്രമല്ല സംഭവ ദിവസം തമിഴ്നാട്ടുകാരാനായ സുഹൃത്ത് മാത്രമാണ് വീട്ടില് ഉണ്ടായിരുന്നത്.
എന്നാൽ പൊലീസിനെതിരായ ആരോപണങ്ങൾ തെക്കുംഭാഗം പൊലീസ് നിഷേധിച്ചു. രാത്രി സമീപത്തെ വീടിന്റെ ചില്ല് തകര്ത്തതായി വിവരം ലഭിച്ചതിനെത്തുടര്ന്നാണ് അന്വേഷിച്ചെത്തിയതെന്ന് ഇവർ പറയുന്നു. തുടർന്ന് അദന്ഷാ ഉള്പ്പെടെ 4 പേരെ കസ്റ്റഡിയിലെടുത്തതെന്നും പൊലീസ് പറഞ്ഞു.
