ജനീവ : പൊതുസ്ഥലങ്ങളില്‍ അണുനാശിനി തളിക്കുന്നത് കൊണ്ട് കോവിഡിനെ ഇല്ലാതാക്കാനാകില്ലെന്ന് ലോകാരോഗ്യ സംഘടന. ഇത് ജനങ്ങളുടെ ആരോഗ്യത്തെ പ്രതികൂലമായി ബാധിക്കുമെന്നും സംഘടന മുന്നറിയിപ്പ് നല്‍കി.
പൊതുസ്ഥലങ്ങളിലും തെരുവുകളിലും അണുനാശിനി തളിക്കുന്നതും പുകയിടുന്നതും കൊണ്ട് കോവിഡില്ലാതാവില്ല. എല്ലാ പ്രതലങ്ങളിലും ഒരുപോലെ അണുനാശിനി തളിക്കുന്നത് ഗുണകരമാവില്ല. രോഗാണുക്കള്‍ നശിക്കുന്ന സമയം വരെയും അണുനാശിനികള്‍ക്ക് പല പ്രതലങ്ങളിലും നിലനില്‍ക്കാനാവില്ല.
ഇത് മനുഷ്യരില്‍ കടുത്ത ആരോഗ്യപ്രശ്‌നങ്ങളുണ്ടാക്കും.ഇത്തരം സ്ഥലങ്ങളില്‍ അടിഞ്ഞുകൂടിയിരിക്കുന്ന മാലിന്യങ്ങളും മറ്റു അവശിഷ്ടങ്ങളും അണുനാശിനിയെ നിര്‍വീര്യമാക്കുകയാണ് ചെയ്യുന്നതെന്നും ലോകാരോഗ്യ സംഘടന അറിയിച്ചു.
ഇത് ആരോഗ്യത്തിന് അപകടം ഉണ്ടാക്കുകയാണ് ചെയ്യുന്നത്.അണുനാശിനി പ്രയോഗിക്കണമെങ്കില്‍, ഇത് ഒരു തുണിയില്‍ മുക്കി തുടയ്ക്കുന്നതാണ് ഫലപ്രദമെന്നും ലോകാരോഗ്യസംഘടന നിര്‍ദേശിച്ചു.
മനുഷ്യ ശരീരത്തില്‍ അണുനാശിനി തളിക്കുന്നത് ശാരീരികമായും മാനസികമായും ഹാനികരമാകാം. വായില്‍നിന്ന് പുറത്തേക്കുപോകുന്ന കണങ്ങളിലൂടേയും സമ്പര്‍ക്കത്തിലൂടെയും മറ്റൊരാള്‍ക്ക് വൈറസ് പകര്‍ത്താനുള്ള രോഗബാധിതന്റെ ശേഷി അണുനാശിനി തളിക്കുന്നതിലൂടെ ഇല്ലാതാക്കാനാവില്ലെന്നും സംഘടന ചൂണ്ടിക്കാട്ടുന്നു. ആളുകളില്‍ ക്ലോറിന്‍ അല്ലെങ്കില്‍ മറ്റ് വിഷ രാസവസ്തുക്കള്‍ തളിക്കുന്നത് കണ്ണ്, ചര്‍മം എന്നിവയില്‍ അസ്വസ്ഥതയുണ്ടാക്കും. ഹൃദയധമനികള്‍ക്കും ദഹനനാളത്തിനും പാര്‍ശ്വ ഫലങ്ങള്‍ ഉണ്ടാക്കാമെന്നും പറയുന്നു.
