ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദം ചുഴലിക്കാറ്റായതായി റിപ്പോര്‍ട്ട്. നിലവില്‍ ബംഗ്ലാദേശ് ഭാഗത്തേയ്ക്കു നീങ്ങുന്ന ചുഴലിക്കാറ്റിൻ്റെ ഭാഗമായി വരുംദിവസങ്ങളില്‍ കേരളത്തില്‍ ഉള്‍പ്പെടെ പരക്കെ മഴ ലഭിക്കുമെന്നാണ് വിവരം. ചൊവ്വാഴ്ചയോടെ പശ്ചിമ ബംഗാളിലും ഒഡീഷയ്ക്കും ഇടയില്‍ വെച്ച് ചുഴലിക്കാറ്റ് തീരം തൊടുമെന്നാണ് കരുതപ്പെടുന്നത്.
ചുഴലിക്കാറ്റിൻ്റെ പശ്ചാത്തലത്തിൽ കൊല്ലം പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിൽ ശനി, ഞായര്‍, തിങ്കള്‍ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. തൃശ്ശൂര്‍, പാലക്കാട് ജില്ലകളില്‍ ചൊവ്വ, ബുധൻ ജില്ലകളിലും യെല്ലോ അലര്‍ട്ടുണ്ട്.
നിലവില്‍ ബംഗാള്‍ ഉള്‍ക്കടലിന്‍റെ തെക്കുഭാഗത്താണ് ചുഴലിക്കാറ്റിൻ്റെ സ്ഥാനം. ഞായര്‍, തിങ്കള്‍ ദിവസങ്ങളില്‍ വടക്കുഭാഗത്തേയ്ക്ക് സഞ്ചരിക്കുന്ന ചുഴലിക്കാറ്റ് തുടര്‍ന്ന് തിങ്കളാഴ്ചയോടെ അതിതീവ്ര ചുഴലിക്കാറ്റാകുമെന്നാണ് പ്രവചനം. ആന്ധ്രാ പ്രദേശ്, ഒഡീഷ, പശ്ചിമ ബംഗാള്‍ എന്നീ സംസ്ഥാനങ്ങളില്‍ ഈ സാഹചര്യത്തിൽ അതീവ ജാഗ്രതാ നിര്‍ദേശം നല്‍കിയിട്ടുണ്ട്. അതേസമയം, ചുഴലിക്കാറ്റിൻ്റെ ദിശ സംബന്ധിച്ച് വ്യക്തത വരാത്തത് പ്രവചനത്തിൽ വെല്ലുവിളിയാകുന്നുണ്ട്.
ചുഴലിക്കാറ്റ് കര തൊടുന്നത് എവിടെയെന്ന കാര്യത്തില്‍ വ്യക്തതയില്ലെങ്കിലും ഒഡീഷയില്‍ മുന്നൊരുക്കങ്ങള്‍ സ്വീകരിക്കുമെന്ന് സര്‍ക്കാര്‍ വ്യക്തമാക്കിയിട്ടുണ്ട്. സംസ്ഥാനത്തിൻ്റെ വടക്കുഭാഗത്തുള്ള തീരദേശ ജില്ലകളായ ജഗതസിങ്പൂര്‍, കേന്ദ്രപാര, ഭദ്രക്, ബാലസോര്‍ തുടങ്ങിയ ഇടങ്ങളില്‍ ജാഗ്രതാ നിര്‍ദേശം നല്‍കിയിട്ടുണ്ട്. ആവശ്യമെങ്കില്‍ ജനങ്ങളെ മാറ്റി പാര്‍പ്പിക്കുന്നത് അടക്കമുള്ള നടപടികള്‍ സ്വീകരിക്കുമെന്നാണ് സ്പെഷ്യല്‍ റിലീഫ് കമ്മീഷണര്‍ പി കെ ജെനയെ ഉദ്ധരിച്ചുള്ള പിടിഐ റിപ്പോര്‍ട്ട്
