യുഎഇ : പ്രവാസികളുടെ വിഷയത്തില്‍ നിലപാട് വീണ്ടും ശക്തമാക്കി യുഎഇ. നാട്ടിലേക്ക് മടങ്ങാന്‍ ആഗ്രഹിക്കുന്ന പൗരന്‍മാരെ സ്വീകരിക്കാത്ത രാജ്യങ്ങളുമായുള്ള വാണിജ്യ ബന്ധവും യുഎഇ പുന:പരിശോധിച്ചേക്കും. ഇന്ത്യ, പാകിസ്താന്‍ ഉള്‍പ്പെടെയുള്ള രാജ്യങ്ങളെ യുഎഇ ഔദ്യോഗികമായി ഇത് അറിയിച്ചതായാണ് സൂചന.
കൊറോണയുടെ സാഹചര്യത്തിൽ നാട്ടിലേക്കു മടങ്ങാന്‍ ആഗ്രഹിക്കുന്ന പൗരന്‍മാരെ സ്വീകരിക്കാത്ത രാജ്യങ്ങള്‍ക്കെതിരെ കര്‍ശന നടപടി വേണ്ടിവരുമെന്ന് കഴിഞ്ഞ ദിവസം യുഎഇ മുന്നറിയിപ്പ് നല്‍കിയിരുന്നു. പ്രവാസികളെ സ്വീകരിക്കാന്‍ തയാറായില്ലെങ്കില്‍ അത്തരം രാജ്യങ്ങളുമായുള്ള തൊഴില്‍ കരാര്‍ പുനഃപരിശോധിക്കുമെന്നായിരുന്നു മുന്നറിയിപ്പ്.
യുഎഇയുമായി ഏറ്റവും വിപുലമായ വാണിജ്യ ബന്ധം നിലനില്‍ക്കുന്ന രാജ്യം എന്ന നിലക്ക് ഇന്ത്യക്കു മേല്‍ സമ്മര്‍ദം ശക്തമാക്കുന്നതാണ് നടപടി. അടിയന്തര സ്വഭാവമുള്ളവര്‍ക്ക് നാട്ടിലേക്ക് മടങ്ങാനുള്ള അവസരമെങ്കിലും ഒരുക്കണമെന്നാണ് പ്രവാസി സമൂഹം ആവശ്യപ്പെടുന്നത്.
