ദില്ലി: കേന്ദ്ര ജീവനക്കാരുടെ ശമ്പളത്തില്‍ നിന്ന് ഒരു വിഹിതം പ്രധാനമന്ത്രിയൂടെ പ്രത്യേക ദുരിതാശ്വാസ ഫണ്ടിലേക്ക് സമാഹരിക്കാനുള്ള നടപടികള്‍ വിവിധ വകുപ്പുകളില്‍ പുരോഗമിക്കുന്നു. മാസത്തില്‍ ഒരു ദിവസത്തെ വേതനം വീതം 2021 മാര്‍ച്ച് വരെ ശമ്പളത്തില്‍ നിന്ന് പിടിക്കുന്ന രീതിയിലാണ് ഇത് ആസൂത്രണം ചെയ്തിട്ടുള്ളത്.
ശമ്പളവിഹിതം നല്‍കേണ്ടത് നിര്‍ബന്ധമല്ലെന്ന് പറയുന്നുണ്ടെങ്കിലും ശമ്പളത്തില്‍ നിന്ന് നേരിട്ട് തുക പിടിക്കുന്ന രൂപത്തിലാണ് ഇത് പ്രവര്‍ത്തിക്കുക. ശമ്പളവിഹിതം നല്‍കാന്‍ ആഗ്രഹിക്കാത്താവര്‍ ബന്ധപ്പെട്ട മേലധികാരിയെ രേഖാമൂലം അറിയിക്കണമെന്ന് ആവശ്യപ്പെട്ട് ധനമന്ത്രാലയത്തിലെ റവന്യൂ വിഭാഗം എല്ലാവര്‍ക്കും സര്‍ക്കുലര്‍ അയച്ചിട്ടുണ്ട്.
പ്രൈംമിനിസ്‌റ്റേര്‍സ് സിറ്റിസണ്‍ അസിസ്റ്റന്‍സ് ആന്‍ഡ് റിലീഫ് ഇന്‍ എമര്‍ജന്‍സി സിറ്റുവേഷന്‍ (പിഎം കെയേര്‍സ്) എന്ന പേരിലുള്ള പ്രത്യേക ദുരിതാശ്വാസ ഫണ്ട് പ്രധാനമന്ത്രിയുടെ കീഴിലുള്ള ട്രസ്റ്റാണ് കൈകാര്യം ചെയ്യുക. ഈ ട്രസ്റ്റിലേക്കുള്ള അംഗങ്ങളെ പ്രധാനമന്ത്രി നേരിട്ടാണ് നിയമിക്കുന്നത്.
മാര്‍ച്ച് 28 നാണ് പിഎം കെയേര്‍സ് എന്ന പ്രത്യേക ഫണ്ട് പ്രധാനമന്ത്രി നരേന്ദ്ര മോദി പ്രഖ്യാപിച്ചത്. ഒരാഴ്ചക്കകം ഇതിലേക്ക് 6500 കോടിയിലധികമാണ് ഒഴുകിയത്. കോര്‍പറേറ്റുകള്‍, സെലിബ്രിറ്റികള്‍, വിവിധ സ്ഥാപനങ്ങള്‍, പ്രമുഖ വ്യക്തികള്‍ തുടങ്ങിയവരെല്ലാം പിഎം കെയേര്‍സിലേക്ക് സംഭാവന നല്‍കുന്നുണ്ട്.
