തിരുവനന്തപുരം : സംസ്ഥാനത്ത് ഒരു കോവിഡ് മരണം കൂടി . തിരുവനന്തപുരം നെട്ടയം സ്വദേശി തങ്കപ്പൻ (76)ആണ് മരിച്ചത് . മുംബൈയിൽ നിന്നാണ് ഇദ്ദേഹം കേരളത്തിലെത്തിയത്.
വന്നപ്പോൾ മുതൽ തന്നെ ശാരീരിക അസ്വസ്ഥകൾ പ്രകടിപ്പിച്ചിരുന്നു ഇദ്ദേഹം. തുടർന്ന് ജനറൽ ആശുപത്രിയിൽ പ്രവേശിപ്പിച്ചു. പിന്നീട് അസുഖം മൂർച്ഛിച്ചതിനെ തുടർന്ന് മെഡിക്കൽ കോളേജിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തിച്ച് ഒരു മണിക്കൂറിനുള്ളിൽ തന്നെ മരണം സംഭവിക്കുകയായിരുന്നുവെന്ന് ആരോഗ്യ പ്രവർത്തകർ അറിയിച്ചു. 27 -നാണ് ഇദ്ദേഹം മരിച്ചത്.
മരണ ശേഷമാണ് സ്രവപരിശോധന നടത്തിയത്. ഫലം വന്നപ്പോൾ രോഗ ബാധ സ്ഥിരീകരിക്കുകയായിരുന്നു. കടുത്ത പ്രമേഹമടക്കം ഗുരുതരമായ ശാരീരിക അസ്വസ്ഥതകൾ വേറെയും ഉണ്ടായിരുന്നുവെന്ന് ആശുപത്രി അധികൃതര് വ്യക്തമാക്കി. അതേസമയം ഉറവിടം കണ്ടെത്താനാകാത്ത കേസുകൾ തലസ്ഥാനത്ത് വർധിക്കുന്നത് അധികൃതരെ ആശങ്കയിലാഴ്ത്തുന്നു. കൂടുതൽ സങ്കീർണമാണെന്നും ജാഗ്രതവേണമെന്നും നഗരസഭാ മേയർ കെ ശ്രീകുമാർ ഇന്നലെ അറിയിച്ചിരുന്നു.