Thursday, March 28, 2024
spot_img

ആടിനെ പുലിയും, പുലിയെ ആടും ,വേണമെങ്കിൽ പുലിയെ സിംഹവും ആക്കുന്ന പബ്ലിക് റിലേഷൻ പണികൾക്ക് കേരളത്തിൽ മിനിമം രണ്ടായിരം വർഷത്തെ പഴക്കം എങ്കിലും ഉണ്ടാകും . നാം പെട്ടന്ന് ഓർക്കുന്നത് വടക്കൻ പാട്ടുകളിലെ പാണന്മാരെ ആണെങ്കിലും .. …
“ദീപ സ്തംഭം മഹാശ്ചര്യം ,നമുക്കും കിട്ടണം പണം ” എന്ന കുഞ്ചൻ നമ്പ്യാർ വചനങ്ങളെ അന്വർത്ഥമാക്കുന്ന P.R. ടീമുകൾ സംഘ കാലം മുതൽക്കേ ഉണ്ടായിരുന്നു എന്നാണ് രേഖകളിൽ നിന്നും മനസിലാകുന്നത് . അന്നവർക്കു ” വിദൂഷകർ ” എന്നായിരുന്നു പേര് . സർക്കസിലെ ബഫൂണുകൾ അഥവാ കോമാളികൾ ഈ വിദൂഷകരുടെ പിൽകാല വകഭേദം / രൂപ ഭേദം ആണെന്ന് വേണമെങ്കിൽ വ്യാഖ്യാനിക്കാം .

മൂന്നു പ്രമുഖ ചേര രാജാക്കന്മാരുടെ P.R . വർക്കിന്റെ ചരിത്രകഥകളിലേക്കു ഒന്നു ഓട്ട പ്രദക്ഷിണം ചെയ്യാം …..

  1. കേരളത്തിലെ ചേര രാജാക്കന്മാരിൽ ആദ്യത്തെ പ്രമുഖൻ ആയിരുന്നു “ഉതിയൻ ചേരൽ” . “വാന വരമ്പൻ” അഥവാ ആകാശം അതിർത്തി ആയി ഉള്ളവൻ എന്നായിരുന്നു ഇട്ടാവട്ട കേരളത്തിന്റെയും ,തമിഴ്നാടിന്റേയും ചില ഭാഗങ്ങൾ ഭരിച്ചിരുന്ന പുള്ളിയെ കുറിച്ചു വിദൂഷകർ തള്ളിയിരുന്നത് . ഇദ്ദേഹം പ്രജാക്ഷേമ തല്പരൻ ആയിരുന്നു എന്നാണ് രേഖകൾ പറയുന്നത് റേഷൻ സമ്പ്രദായം ഏറ്റവും മികച്ച രീതിയിൽ നടത്തിയിരുന്നത് കൊണ്ട്
    ” പെരും ചോറ്റു ഉതിയൻ ‘ എന്ന പേരും പുള്ളിക്ക് ഉണ്ടായിരുന്നു . പക്ഷെ പുള്ളിയുടെ P.R. ജോലിക്കാർ ഭാവി കൂടി കണ്ടു തള്ളിയത് കൊണ്ടാണോ ,അതോ ചരിത്രകാരന്മാർക്കു കാല ഗണനയിൽ പറ്റിയ പിഴവ് ആണോ എന്നറിയില്ല , മഹാഭാരത യുദ്ധ സമയത്തു ഇരുപക്ഷത്തിനും ആഹാരം നൽകിയത് കൊണ്ടാണ് ആ പേര് വന്നതെന്നും പറയുന്നുണ്ട് .
  2. ഉതിയൻ ചേരലിന്റെ പുത്രൻ ആയിരുന്നു അടുത്ത ചേര രാജാവ് . ” ഇമയ വരമ്പൻ ” എന്നറിയപ്പെട്ട നെടും ചേരലാതൻ .ഇമയവരമ്പൻ എന്നാൽ ഹിമാലയം അതിരാക്കിയവൻ എന്നർത്ഥം . ഭാരതത്തിന്റെ ചരിത്രത്തിൽ ഒരിടത്തും ഒരു ദക്ഷിണ ദേശ രാജാവ് ഉത്തര ഭാരതം കീഴടക്കിയതായി രേഖകൾ ഇല്ലാത്തതു കൊണ്ട് , പുള്ളി വല്ല കേദാർനാഥിലോ , മാനസ സരസിലോ തീർത്ഥാടനം പോയത് അന്നത്തെ P.R. അണ്ണന്മാർ വ്യാഖ്യാനിച്ചു വെളുപ്പിച്ചത് ആകണം ഹിമാലയൻ അതിർത്തി എന്ന ഹിമാലയൻ ബ്ലണ്ടർ . പക്ഷേ കടൽ കൊള്ളക്കാരായ യവനന്മാരെ പുള്ളി തോല്പിച്ചതായി പറയുന്നത് ശരിയാകാൻ ആണ് സാധ്യത .

3.നെടും ചേരലാതന്റെ മകൻ ആയിരുന്നു ചേര ചക്രവർത്തിമാരിൽ ഏറ്റവും പ്രമുഖനായ ചേരൻ ചെങ്കുട്ടുവൻ എന്നറിയപ്പെടുന്ന
വേൽകെഴു കൂട്ടുവൻ . ചോളന്മാരെ അടിച്ചു ഓടിച്ചതും , കൊടുങ്ങല്ലൂർ ക്ഷേത്രത്തിൽ കണ്ണകി പ്രതിഷ്ഠ നടത്തിയതും ഓക്കെ ഇദ്ദേഹം ആയിരുന്നു . ചിലപ്പതികാരം എഴുതിയ ഇളങ്കോ അടികൾ ഇദ്ദേഹത്തിന്റെ അനുജൻ ആയിരുന്നു .

ചേരൻ ചെങ്കുട്ടുവനെ കുറിച്ചുള്ള തള്ളൽ . ” കടൽ പിറകോട്ടിയ കൂട്ടുവൻ ” അഥവാ തന്റെ വേലു കൊണ്ട് കടലിനെ പിന്നോട്ട് ഓടിച്ചവൻ എന്നാണ് . ഇദ്ദേഹത്തിന്റെ കാലത്ത് നാവിക വിജയം നേടിയതോ , അല്ലെങ്കിൽ കടൽ പിറകോട്ടു ഉൾ വലിഞ്ഞതോ ഓക്കെ ആകാം പ്രസ്തുത പേരിനു കാരണം എന്നാണ് ചരിത്രകാരന്മാർ പറയുന്നത് പക്ഷേ P.R.ടീം പുള്ളിക്ക് യമണ്ടൻ മൈലേജ് തന്നെ ഉണ്ടാക്കി കൊടുത്തിരുന്നു .

ലോകത്തെ വ്യവസ്ഥാപിത മതങ്ങളും ,പ്രവാചകന്മാരും,ചക്രവർത്തിമാരും രാഷ്ട്രീയക്കാരും ഓക്കെ ശിഷ്യന്മാരുടെ/ ഭൃത്യന്മാരുടെ / അണികളുടെ P.R. വർക്കിനെ ആശ്രയിച്ചു മാത്രം മുന്നേറിയവർ ആണ് . .ചിലർ സ്വയം തള്ളിയും , മറ്റു ചിലർ ശിങ്കിടികളെ കൊണ്ട് തള്ളിച്ചും എന്നു മാത്രം .. ????????

Related Articles

Latest Articles