കോല്ക്കത്ത: ബംഗാളിലെ മമതാ സര്ക്കാര് ജനാധിപത്യവിരുദ്ധ, ഭരണഘടനാവിരുദ്ധ നടപടികളിലൂടെ കുഴപ്പങ്ങളുണ്ടാക്കാന് ശ്രമിക്കുകയാണെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്. ബംഗാളിന്റെ മണ്ണില് തന്നെപ്പോലെയൊരു സന്യാസിയെ കാലുകുത്താന് അനുവദിക്കില്ലെന്നു പറയുന്നതിന്റെ കാരണമെന്താണെന്നും അദ്ദേഹം ചോദിച്ചു. ബംഗാളിലെ പുരുലിയയില് തെരഞ്ഞെടുപ്പ് പ്രചാരണത്തിനു എത്തിയതായിരുന്നു അദ്ദേഹം. മുഖ്യമന്ത്രി ധര്ണ ഇരിക്കുന്നതിലും അപമാനകരമായി ജനാധിപത്യത്തില് മറ്റൊന്നില്ലെന്നും യോഗി പറഞ്ഞു.
ഹെലികോപ്റ്ററില് വന്നിറങ്ങാന് പശ്ചിമബംഗാള് സര്ക്കാര് അനുമതി നിഷേധിച്ചതിനെ തുടര്ന്ന് റോഡ് മാര്ഗമാണ് ജാര്ഖണ്ഡിലെ ബൊക്കാറോയില്നിന്നും യോഗി ബംഗാളിലെത്തിയത്. ജാര്ഖണ്ഡിന്റെ തലസ്ഥാനമായ റാഞ്ചിയില് എത്തിയ യോഗി ഇവിടെനിന്നും ഹെലികോപ്റ്റര് മാര്ഗം ബൊക്കാറോയില് വന്നു. ബൊക്കാറോയില് നിന്നു റോഡ് മാര്ഗമാണ് പുരുലിയയില് എത്തിയത്. ബൊക്കാറോയ്ക്ക് അടുത്താണ് പുരുലിയ.
ബംഗാളിലെ തെക്കന് ദിനാജ്പുരിലെ ബലൂര്ഘട്ടിലും ഹെലികോപ്റ്ററില് വന്നിറങ്ങാന് യോഗിക്ക് നേരത്തെ അനുമതി നിഷേധിച്ചിരുന്നു. പ്രധാനമന്ത്രി നരേന്ദ്ര മോദിയുടെ റാലിക്കു പിന്നാലെ റാലി നടത്താനുള്ള യോഗിയുടെ നീക്കമാണ് മമത തടഞ്ഞത്. തുടര്ന്ന് ടെലിഫോണിലൂടെയായിരുന്നു ആദിത്യനാഥ് റാലിയെ അഭിസംബോധന ചെയ്തത്. മുമ്പ് ബിജെപി അധ്യക്ഷന് അമിത് ഷായുടെ ഹെലികോപ്റ്ററിനും ബംഗാളിലെ മാണ്ടയില് ഇറങ്ങാന് അനുമതി നിഷേധിച്ചിരുന്നു. തുടര്ന്ന് സ്വകാര്യ ഹെലിപാഡിലായിരുന്നു അമിത് ഷായുടെ ഹെലികോപ്റ്റര് ഇറങ്ങിയത്.