ശശി തരൂരണ്ണൻ ബംഗാളിയിലും പുലിയാണ്

തിരുവനന്തപുരം: കൊവിഡ് 19ന്‍റെ വ്യാപനം തടയുന്നതിൻ്റെ ഭാഗമായി ഏര്‍പ്പെടുത്തിയ ലോക്ക് ടൗണിൻ്റെ പശ്ചാത്തലത്തില്‍ സ്വദേശത്തേക്ക് മടങ്ങിപ്പോകണമെന്ന് ആവശ്യപ്പെട്ട കേരളത്തിലെ പശ്ചിമ ബംഗാളില്‍ നിന്നുള്ള അന്യസംസ്ഥാന തൊഴിലാളികള്‍ക്കായി ശശി തരൂര്‍ എം പി യുടെ പുതിയ ട്വീറ്റ്. ബംഗാളി ഭാഷയിലാണ് എം പി യുടെ പുതിയ ട്വീറ്റ് . അതി കഠിനമായ ഇംഗ്ലീഷ് ഭാഷയിലെ ട്വീറ്റുകള്‍ മാത്രമല്ല ബംഗാളി ഭാഷയും തനിക്ക് വഴങ്ങുമെന്ന് വ്യക്തമാക്കിയിരിക്കുകയാണ് ശശി തരൂര്‍ എം പി .’സ്ഥിതിഗതികള്‍ ആശങ്കയുണ്ടാക്കുന്നതാണ് എന്ന് എനിക്ക് മനസിലാവുന്നുണ്ട്. എന്നാല്‍, ഇപ്പോള്‍ എല്ലാം അടച്ചിരിക്കുന്നതിനാല്‍ ഒരു സംസ്ഥാന അതിര്‍ത്തിയും കടക്കാന്‍ കഴിയില്ലെന്ന് നിങ്ങള്‍ മനസ്സിലാക്കേണ്ടതുണ്ട്. ഈ ഘട്ടത്തില്‍ കുടിയേറ്റ തൊഴിലാളികള്‍ക്ക് ഭക്ഷണം, വെള്ളം, മറ്റ് സാധനങ്ങള്‍ എന്നിവ കേരള സര്‍ക്കാര്‍ ഉറപ്പ് നല്‍കിയിട്ടുണ്ട്. നിങ്ങള്‍ എവിടെയായിരുന്നാലും അവിടെ തന്നെ തുടരണമെന്നാണ് എന്‍റെ അഭ്യര്‍ത്ഥനയെന്ന് ‘ ശശി തരൂര്‍ വീഡിയോയില്‍ ആവശ്യപ്പെടുന്നു. എഴുതി തയ്യാറാക്കിയ കുറിപ്പില്‍ നിന്നാണ് തരൂര്‍ വായിക്കുന്നതെന്ന് വ്യക്തമാകുന്ന രീതിയിലാണ് വീഡിയോ ചിത്രീകരിച്ചിട്ടുളളത്.