വീണ്ടും ആത്മഹത്യ: ഭര്‍തൃവീട്ടില്‍ ഇരുപത്തിരണ്ടുകാരിയായ യുവതി തൂങ്ങിമരിച്ച നിലയില്‍; പിന്നിൽ ദുരൂഹതയെന്ന് പോലീസ്

പെരിയ: ഇരുപത്തിരണ്ടുകാരിയായ യുവതി ഭര്‍തൃവീട്ടില്‍ തൂങ്ങിമരിച്ച നിലയില്‍. കാസർകോട് പെരിയയിലാണ് സംഭവത്തെ. കല്യോട്ട് തെക്കുകര വീട്ടില്‍ മഹേഷിന്‍റെ ഭാര്യ അനുവിനെയാണ് ഭര്‍തൃവീട്ടില്‍ തൂങ്ങിമരിച്ച നിലയില്‍ കണ്ടെത്തിയത്.

കോട്ടയം പാമ്പാടി സ്വദേശിയായ അനുവിന്‍റെയും മഹേഷിന്‍റെയും പ്രണയ വിവാഹമായിരുന്നു. രണ്ട് വര്‍ഷം മുന്‍പായിരുന്നു വിവാഹം. ഇരുവര്‍ക്കും ഒന്‍പത് മാസം പ്രായമുള്ള പെണ്‍കുഞ്ഞുണ്ട്. ആത്മഹത്യയ്ക്ക് പിന്നിലെ കാരണം എന്താണെന്ന് വ്യക്തമല്ല. സംഭവത്തിൽ പോലീസ് കേസെടുത്ത് അന്വേഷണമാരംഭിച്ചു. യുവതിയുടെ മരണത്തിനുപിന്നിൽ എന്തെങ്കിലും ദുരൂഹതയുണ്ടോ എന്നതുൾപ്പെടെ പോലീസ് അന്വേഷിക്കുന്നുണ്ട്. അതേസമയം യുവതിയുടെ ഭർത്താവിനെ ഉടൻ ചോദ്യം ചെയ്തേക്കുമെന്നാണ് സൂചന.

സംസ്ഥാനത്ത് യുവതികളുടെ ആത്മഹത്യ വർധിച്ചുകൊണ്ടിരിക്കുകയാണ്. കഴിഞ്ഞ രണ്ടുമൂന്നു മാസത്തിനിടെ നിരവധി ആത്മഹത്യകളാണ് പല ജില്ലകളിൽ നിന്നും റിപ്പോർട്ട് ചെയ്തത്. ഇതിൽ ഏറ്റവും ഒടുവിലത്തേതായിരുന്നു കൊല്ലത്തെ സുനീഷയുടെ ആത്മഹത്യ. കൊല്ലം ജില്ലയിൽ തന്നെയുണ്ടായ വിസ്മയയുടെ ആത്മഹത്യയും കേരളത്തെ ഏറെ നടുക്കുന്നതായിരുന്നു.