ദില്ലി: രാജ്യത്തെ മൂന്ന് കോടിയിലധികം വരുന്ന കര്‍ഷകരെ പ്രതിനിധീകരിച്ചിരുന്നത്, 71 കര്‍ഷക സംഘടനകള്‍ ആയിരുന്നു. ഇതില്‍, 61 കര്‍ഷക യൂണിയനുകളും കാര്‍ഷിക നിയമങ്ങളെ പിന്തുണച്ചിരുന്നുവെന്ന നിർണ്ണയാക കണക്കുമായി സുപ്രീംകോടതി നിയോഗിച്ച കമ്മിറ്റി അംഗങ്ങളുടെ റിപ്പോർട്ട്. 86% കര്‍ഷക യൂണിയനുകളും, കര്‍ഷക പ്രക്ഷോഭങ്ങളെ തുടര്‍ന്ന് റദ്ദാക്കിയ കാര്‍ഷിക നിയമങ്ങളെ പിന്തുണച്ചിരുന്നതായി കമ്മിറ്റി അംഗങ്ങള്‍ സുപ്രീംകോടതിക്ക് സമര്‍പ്പിച്ച റിപ്പോര്‍ട്ടില്‍ വ്യക്തമാക്കുന്നു. തിങ്കളാഴ്ചയാണ് സമിതി അംഗങ്ങള്‍ റിപ്പോര്‍ട്ട് പുറത്തുവിട്ടത്.കൂടാതെ കേന്ദ്രസര്‍ക്കാര്‍ നടപ്പിലാക്കിയ കാര്‍ഷിക നിയമങ്ങളോട് ഇവര്‍ മുഖം തിരിച്ചിരുന്നില്ല എന്നാണ് റിപ്പോര്‍ട്ട് വ്യക്തമാക്കുന്നത്. കേന്ദ്രസര്‍ക്കാര്‍ കൊണ്ടുവന്ന കാര്‍ഷിക നിയമങ്ങള്‍ക്കെതിരെ, കര്‍ഷകരുടെ പ്രതിഷേധം വ്യാപകമായപ്പോള്‍, നിയമങ്ങളുടെ വശങ്ങള്‍ പഠിക്കാന്‍ സുപ്രീം കോടതി, വിദഗ്ദ്ധ സംഘത്തെ ഉള്‍പ്പെടുത്തി സമിതി രൂപീകരിച്ചിരുന്നു.
അതേസമയം കാര്‍ഷിക സാമ്പത്തിക വിദഗ്ധന്‍ അശോക് ഗുലാത്തി, അനില്‍ ഘന്‍വത്, ഷേത്കാരി സംഘടന, ഇന്റര്‍നാഷണല്‍ ഫുഡ് പോളിസി റിസര്‍ച്ച് ഇന്‍സ്റ്റിറ്റ്യൂട്ടിലെ പ്രമോദ് കുമാര്‍ ജോഷി, ഭാരതീയ കിസാന്‍ യൂണിയന്റെ ഒരു വിഭാഗം പ്രസിഡന്റ് ഭൂപീന്ദര്‍ സിംഗ് മാന്‍ എന്നിവരാണ് സമിതിയില്‍ ഉണ്ടായിരുന്നത്. നിയമങ്ങള്‍ ഇതിനകം റദ്ദാക്കിയതിനാല്‍ സമിതിയുടെ നിരീക്ഷണങ്ങള്‍ക്ക് കാര്യമായ പ്രാധാന്യമൊന്നുമില്ലെന്ന് സമിതി അംഗങ്ങള്‍ പറയുന്നു.എന്നാൽ അതിനിടെ കാര്‍ഷിക നിയമങ്ങള്‍ (farm laws) എന്ന ഹാഷ്ടാഗ് ട്വിറ്ററില്‍ ട്രെന്‍ഡിംഗായി മാറി. മോദി സര്‍ക്കാര്‍ കൊണ്ടുവന്ന മൂന്ന് കര്‍ഷക ഭേദഗതി നിയമങ്ങള്‍ ഭൂരിപക്ഷം കര്‍ഷക സംഘടനകളും പിന്തുണച്ചിരുന്നുവെന്ന സുപ്രീം കോടതി നിയമിച്ച സമിതി റിപ്പോര്‍ട്ടിന്റെ പശ്ചാത്തലത്തിലാണിത്. രാജ്യത്തിന്റെ വിവിധ ഭാഗങ്ങളിലുള്ള കര്‍ഷകര്‍ മാസങ്ങളോളം ദില്ലി അതിര്‍ത്തികളില്‍ തമ്പടിച്ച് സമരം ചെയ്തതിനെ തുടര്‍ന്ന് കേന്ദ്ര സര്‍ക്കാര്‍ പാര്‍ലിമെന്റില്‍ ഈ നിയമങ്ങള്‍ പിന്‍വലിച്ചിരുന്നു. ഇതിനിടയിലാണ് കര്‍ഷക നിയമങ്ങളെ 86 ശതമാനം സംഘടനകളും പിന്തുണച്ചിരുന്നുവെന്ന റിപ്പോര്‍ട്ട് വരുന്നത്.
