ഭോപ്പാൽ: കർണാടകയ്ക്ക് പുറമേ ഹിജാബ് നിരോധിക്കാനൊരുങ്ങി മധ്യപ്രദേശ് സർക്കാരും. സംസ്ഥാനത്തെ വിദ്യാഭ്യാസ സ്ഥാപനങ്ങളില് ഹിജാബ് നിരോധിക്കുന്നതിനെക്കുറിച്ച് മധ്യപ്രദേശ് സര്ക്കാരും ആലോചിക്കുന്നതായാണ് പുറത്തുവരുന്ന റിപ്പോർട്ട്.
കർണാടകയിൽ വിദ്യാഭ്യാസ സ്ഥാപനങ്ങളിൽ ഹിജാബ് നിരോധിക്കുന്നതിന് അനുകൂലിച്ച് മധ്യപ്രദേശ് സ്കൂൾ വിദ്യാഭ്യാസ മന്ത്രി ഇന്ദർ സിംഗ് പർമർ രംഗത്ത് വന്നു. കൂടാതെ സർക്കാർ അച്ചടക്കത്തിനാണ് മുൻഗണന നൽകുന്നതെന്നും അദ്ദേഹം പറഞ്ഞു.
മാത്രമല്ല സംസ്ഥാനത്തെ സ്കൂളുകളിൽ ഹിജാബ് നിരോധിക്കുമോയെന്ന ചോദ്യത്തിന് ആവശ്യമെങ്കിൽ വിഷയം പരിശോധിച്ച ശേഷം തീരുമാനമെടുക്കുമെന്നും മന്ത്രി പറഞ്ഞു.
“ഹിജാബ് സ്കൂൾ യൂണിഫോമിന്റെ ഭാഗമല്ല, അതിനാൽ സ്കൂളുകളിൽ അത് ധരിക്കുന്നത് നിരോധിക്കേണ്ടതാണ്. ഈ പാരമ്പര്യങ്ങൾ ആളുകൾ പിന്തുടരേണ്ടത് അവരുടെ വീടുകളിലാണ്, അല്ലാതെ സ്കൂളുകളിലല്ല. സ്കൂളുകളിൽ ഡ്രസ് കോഡ് കർശനമായി നടപ്പിലാക്കുന്നതിനാണ് ഞങ്ങൾ മുൻ ഗണന നൽകുന്നത് ” – അദ്ദേഹം പറഞ്ഞു.
അതുപോലെ പുതുച്ചേരിയിൽ, അരയങ്കുപ്പത്തെ സർക്കാർ സ്കൂളിൽ ക്ലാസിൽ ശിരോവസ്ത്രം ധരിച്ച് എത്തിയത് അധ്യാപിക എതിർത്തതായും സൂചനയുണ്ട്.എന്നാൽ ഇതിനെ കുറിച്ച് അന്വേഷിക്കാൻ സ്കൂൾ മേധാവിയോട് അധികൃതർ ആവശ്യപ്പെട്ടിരിക്കുകയാണ്.
അതേസമയം മധ്യപ്രദേശിൽ ഏകദേശം 1.25 ലക്ഷം സർക്കാർ സ്കൂളുകളുണ്ട്, അവിടെ സ്കൂൾ യൂണിഫോം നിർബന്ധിതമാക്കിയിട്ടുണ്ട്. ഒന്നാം ക്ലാസ് മുതൽ എട്ടാം ക്ലാസ് വരെയുള്ള വിദ്യാർത്ഥികളുടെ യൂണിഫോമിന് സംസ്ഥാന സർക്കാരാണ് പണം നൽകുന്നത്.

