തൃശ്ശൂര്‍: ജില്ലയിലെ കുടിവെള്ള പ്രശ്നം ചൂണ്ടിക്കാട്ടി തൃശൂർ കോര്‍പ്പറേഷനില്‍ യുഡിഎഫ് കൗണ്‍സിലര്‍മാരുടെ ശക്തമായ പ്രതിഷേധം. ബഹളത്തിനിടെ കൗണ്‍സില്‍ യോഗത്തില്‍ നിന്ന് ഇറങ്ങിപ്പോയ മേയര്‍ എം.കെ വര്‍ഗീസ് പ്രതിഷേധിച്ച കൗണ്‍സിലര്‍മാര്‍ക്ക് നേരെ വാഹനം ഓടിച്ചുകയറ്റിയെന്ന് പ്രതിപക്ഷം ആരോപിച്ചു. ഇന്ന് കൗണ്‍സില്‍ യോഗം പിരിച്ചുവിട്ട് കാറില്‍ കയറിയ മേയര്‍ക്ക് പിന്നാലെ ചെന്ന് കൗണ്‍സിലര്‍മാര്‍ മുദ്രാവാക്യം വിളിച്ച് പ്രതിഷേധിക്കുകയായിരുന്നു. തുടർന്ന് മേയറുടെ വാഹനം തടഞ്ഞ് കൗണ്‍സിലര്‍മാര്‍ക്ക് പ്രതിഷേധിച്ചതോടെ തര്‍ക്കം രൂക്ഷമായി.
അതേസമയം മേയറുടെ കോലത്തില്‍ കൗണ്‍സിലര്‍മാര്‍ ചെളിവെള്ളമൊഴിച്ചു. പ്രതിഷേധക്കാരെ കാറിന്‌ മുന്നില്‍നിന്ന് മാറ്റിയശേഷമാണ് മേയറുടെ വാഹനത്തിന് കടന്നുപോകാനായത്. പിന്നീട് മേയര്‍ കാര്‍ ഇടിപ്പിച്ച് കയറ്റിയെന്ന് ആരോപിച്ച് പ്രതിപക്ഷ കൗണ്‍സിലര്‍മാര്‍ ചേംമ്പറിനുള്ളിലും പ്രതിഷേധം തുടർന്നു.എന്നാൽ പ്രതിപക്ഷ പ്രതിഷേധത്തിനിടെ സമാധാനപരമായി സംസാരിക്കേണ്ട മേയര്‍ കാര്‍ മുന്നോട്ട് പോട്ടെയെന്നാണ് ഡ്രൈവര്‍ക്ക് നിര്‍ദേശം നല്‍കിയതെന്നും അപകടത്തില്‍ ചില യുഡിഎഫ് കൗണ്‍സിലര്‍മാര്‍ക്ക് പരിക്കേറ്റതായും പ്രതിപക്ഷം ശക്തമായി ആരോപിച്ചു.
