തിരുവനന്തപുരം: ‘നല്ല ഭക്ഷണം നാടിന്റെ അവകാശം’ എന്ന ക്യാമ്പയിന്റെ ഭാഗമായി ഇന്ന് 253 പരിശോധനകൾ ഭക്ഷ്യസുരക്ഷാ വകുപ്പ് നടത്തിയതായി ആരോഗ്യ വകുപ്പ് മന്ത്രി വീണാ ജോർജ്. ലൈസന്സോ രജിസ്ട്രേഷനോ ഇല്ലാത്ത 20 കടകള്ക്കെതിരെ നടപടി സ്വീകരിച്ചു. തുടർന്ന് 86 സ്ഥാപനങ്ങള്ക്ക് നോട്ടീസ് നല്കി.
അതേസമയം കടകളിൽ നിന്ന് 31 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 26 സാമ്പിളുകള് പരിശോധനയ്ക്കയച്ചെന്നും മന്ത്രി പറഞ്ഞു. ഈ മാസം 2 മുതൽ ഇന്നുവരെ കഴിഞ്ഞ 9 ദിവസങ്ങളിലായി സംസ്ഥാന വ്യാപകമായി 2183 പരിശോധനകളാണ് നടത്തിയത്.
ഇതുവരെ 201 കടകള്ക്കെതിരെ ലൈസന്സോ രജിസ്ട്രേഷനോ ഇല്ലാത്തതിനാൽ നടപടി സ്വീകരിച്ചിട്ടുണ്ട്. 717 സ്ഥാപനങ്ങള്ക്ക് നോട്ടീസ് നല്കി. 314 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 185 സാമ്പിളുകള് പരിശോധനയ്ക്കയച്ചതായും മന്ത്രി അറിയിച്ചു.
നിലവിൽ ഓപ്പറേഷൻ മത്സ്യയുടെ ഭാഗമായി 6240 കിലോഗ്രാം പഴകിയതും രാസവസ്തുക്കൾ കലർന്നതുമായ മത്സ്യമാണ് ഇതുവരെ നശിപ്പിച്ചത്. ഇപ്പോൾ നടത്തിയ 4169 പരിശോധനകളില് 2239 സാമ്പിളുകള് ശേഖരിച്ച് പരിശോധനയ്ക്കായി അയച്ചിട്ടുണ്ട്. 89 പേർക്ക് നോട്ടീസ് നൽകി. ശർക്കരയിൽ മായം കണ്ടെത്താനായി ആവിഷ്ക്കരിച്ച ഓപ്പറേഷൻ ജാഗറിയുടെ ഭാഗമായി 521 സ്ഥാപനങ്ങള് പരിശോധിച്ചു. വിദഗ്ധ ലബോറട്ടറി പരിശോധനയ്ക്കായി ശര്ക്കരയുടെ 137 സര്വയലന്സ് സാമ്പിള് ശേഖരിച്ചിട്ടുണ്ട്.
