കൊച്ചി: ഇലന്തൂർ ഇരട്ടനരബലി കേസിന്റെ അന്വേഷണത്തിന് ഇന്ന് മുതൽ പ്രത്യേക സംഘം. കൊച്ചി സിറ്റി ഡെപ്യൂട്ടി പോലീസ് കമ്മീഷണര് എസ് ശശിധരനാണ് പ്രത്യേക അന്വേഷണ സംഘത്തിന്റെ തലവന്. ക്രമസമാധാന വിഭാഗം എഡിജിപിയുടെ മേല്നോട്ടത്തിലായിരിക്കും അന്വേഷണസംഘം പ്രവര്ത്തിക്കുക. പത്മ, റോസ്ലി എന്നിവരുടെ കൊലപാതകവുമായി ബന്ധപ്പെട്ട് കടവന്ത്ര, കാലടി പോലീസ് സ്റ്റേഷനുകളില് രജിസ്റ്റര് ചെയ്ത കേസുകള് അന്വേഷിക്കുന്നതിനാണ് പ്രത്യേക അന്വേഷണ സംഘത്തെ രൂപീകരിച്ചത്. പെരുമ്പാവൂര് എഎസ്പി അനൂജ് പാലിവാള് ആണ് മുഖ്യ അന്വേഷണ ഉദ്യോഗസ്ഥൻ.
എറണാകുളം സെന്ട്രല് അസിസ്റ്റന്റ് കമ്മീഷണര് സി ജയകുമാര്, കടവന്ത്ര സ്റ്റേഷന് ഹൗസ് ഓഫീസര് ബൈജു ജോസ്, കാലടി സ്റ്റേഷന് ഹൗസ് ഓഫീസര് അനൂപ് എന്എ എന്നിവര് അന്വേഷണ ഉദ്യോഗസ്ഥരും എളമക്കര പോലീസ് സ്റ്റേഷനിലെ സബ്ബ് ഇന്സ്പെക്ടര് എയിന് ബാബു, കാലടി പോലീസ് സ്റ്റേഷനിലെ സബ്ബ് ഇന്സ്പെക്ടര് ബിപിന്.ടി.ബി എന്നിവര് സംഘത്തിലെ അംഗങ്ങളുമാണ്.
പത്മയെ ഷാഫിയും ലൈലയും ചേര്ന്നാണ് കൊലപ്പെടുത്തിയത്. കൊലപാതകത്തിന് ശേഷം പത്മയുടെ മൃതദേഹം 56 കഷ്ണങ്ങളാക്കി കുഴിച്ചിട്ടു. റോസ്ലിയെ കഴുത്തറത്ത് കൊലപ്പെടുത്തിയ ശേഷം ഭഗവല് സിംഗ് മാറിടം മുറിച്ചുമാറ്റിയെന്നും റിമാൻഡ് റിപ്പോര്ട്ടിലുണ്ട്. കേസില് പ്രതികളെ രണ്ടാഴ്ചത്തേക്ക് റിമാന്ഡ് ചെയ്തു. കാക്കനാട് ജയിലിലേക്ക് പ്രതികളെ മാറ്റിയിട്ടുണ്ട്.
