മുംബൈ : ഓസ്ട്രേലിയയ്ക്കെതിരായ ഏകദിന പരമ്പരയിൽ ടീമിലുൾപ്പെടുത്താൻ ഏറെ സാധ്യത കൽപ്പിച്ചിരുന്ന സഞ്ജു സാംസണെ ടീമിൽ ഉൾപ്പെടുത്താത്തതിനെതിരെ പ്രതികരിച്ച് മുൻ ഇന്ത്യൻ താരം ആകാശ് ചോപ്ര രംഗത്തു വന്നു. ശ്രേയസ് അയ്യരും, ക്യാപ്റ്റന്‍ രോഹിത് ശർമയും ടീമിൽ ഇല്ലാത്ത സാഹചര്യത്തിൽ, സഞ്ജു സാംസണ്‍ ഉണ്ടാകേണ്ടതല്ലേയെന്നു ആകാശ് ചോപ്ര ട്വീറ്റ് ചെയ്തു.
ഓസ്ട്രേലിയയ്ക്കെതിരെ നാലാം ടെസ്റ്റിൽ കടുത്ത നടുവേദന അനുഭവപ്പെട്ടതിനെത്തുടർന്ന് ശ്രേയസ് ഇപ്പോൾ ബെംഗളൂരുവിലെ നാഷനൽ ക്രിക്കറ്റ് അക്കാദമിയിൽ ചികിത്സയ്ക്കു ശേഷം വിശ്രമത്തിലാണ്. കൊൽക്കത്ത നൈറ്റ് റൈഡേഴ്സിന്റെ നായകനായ ശ്രേയസിന് ഇത്തവണത്തെ ഐപിഎല്ലും നഷ്ടമാകുമെന്നാണ് റിപ്പോർട്ട്.
ഏകദിന കരിയറിൽ 66 ശരാശരിയിലാണ് സഞ്ജു ബാറ്റ് വീശുന്നത്. 2022ന്റെ തുടക്കത്തിൽ ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിൽ പുറത്താകാതെ 86 റൺസും അതേ വർഷം ജൂണിൽ, അയർലൻഡിനെതിരെ 42 പന്തിൽ 77 റൺസടിച്ചും കഴിവ് ആവർത്തിച്ച് പ്രകടിപ്പിച്ചെങ്കിലും സെലക്ടർമാർ സഞ്ജുവിന് നേരെ കണ്ണടയ്ക്കുന്നത് തുടരുകയാണ്. നിലവിൽ ഇന്ത്യൻ പ്രീമിയർ ലീഗ് മത്സരങ്ങള്‍ക്കുള്ള ഒരുക്കത്തിലാണ് സഞ്ജു.
