പാറ്റ്‌ന : ബിഹാറിൽ ജെഡിയു സർക്കാർ നടത്തിയ ജയിൽ ചട്ടങ്ങളിൽ വരുത്തിയ പരിഷ്കാരങ്ങൾ കാരണം തടവ് ശിക്ഷ അനുഭവിക്കുകയായിരുന്ന മുൻ എംപിയും കൊലക്കേസ് പ്രതിയുമായ ആനന്ദ് മോഹൻ സിങ് ജയിൽ മോചിതനാകും. നടപ്പിലാക്കിയ പരിഷ്കരണം മൂലം 27 തടവുകാരാണ് ജയിൽ മോചിതരാകുക. ഈ മാസം ആദ്യമാണ് ബിഹാർ സർക്കാർ ജയിൽനിയമങ്ങൾ പരിഷ്‌കരിച്ചത്. സർക്കാർ ജീവനക്കാരെ ഔദ്യോഗിക കൃത്യനിർവഹണത്തിനിടെ കൊലപ്പെടുത്തിയവർക്ക് ശിക്ഷാ ഇളവില്ല എന്ന ചട്ടമടക്കം റദ്ദാക്കിയത് സംസ്ഥാനത്ത് വൻ പ്രതിഷേധത്തിനിടയാക്കിയിരുന്നു.
ആനന്ദ് മോഹൻ സിങ്ങിന്റെ നേതൃത്വത്തിലുള്ള സംഘം,1994ൽ ഗോപാൽഗഞ്ച് ജില്ലയിലെ ജില്ലാ മജിസ്‌ട്രേറ്റ് ജി.കൃഷ്ണനായിക്കിനെയാണ് കൊലപ്പെടുത്തിയത്. കേസിൽ ആനന്ദ് മോഹന് 2007ൽ ബിഹാർ കോടതി വധശിക്ഷ വിധിച്ചിരുന്നു. എന്നാൽ പാറ്റ്‌ന ഹൈക്കോടതി അത് ജീവപര്യന്തമായി ഇളവു ചെയ്തിരുന്നു.
ക്രിമിനൽ പശ്ചാത്തലമുള്ളവരെ മോചിപ്പിക്കുന്നതിനെതിരെ ബിജെപി ഐടി സെൽ മേധാവി അമിത് മാളവ്യ രംഗത്തെത്തി. ദലിത് വിരുദ്ധ നീക്കങ്ങൾക്കാണ്, ആനന്ദ് മോഹന് ശിക്ഷാ ഇളവു നൽകിയതെന്നും അതിൽ ദുരൂഹതയുണ്ടെന്നും ബിഎസ്പി കുറ്റപ്പെടുത്തി. ബിഹാർ സർക്കാരിന്റെ ഈ നീക്കം രാജ്യവ്യാപകമായി ചർച്ച ചെയ്യപ്പെടേണ്ടതുണ്ടെന്ന് ബിഎസ്പി നേതാവ് മായാവതി ട്വീറ്റ് ചെയ്തു.
ആനന്ദ് മോഹൻ സിങ്ങിന്റെ മോചനം രജ്പുത് വോട്ടർമാരെ സ്വാധീനിക്കാനാണെന്നാണ് കരുതപ്പെടുന്നത്. കഴിഞ്ഞ രണ്ടു വർഷമായി നിരവധി നേതാക്കൾ ആനന്ദ് മോഹൻ സിങ്ങിന്റെ മോചനം ആവശ്യപ്പെട്ടിരുന്നു.
