ദില്ലി : വികസിത് ഭാരത് @2047: വോയ്സ് ഓഫ് യൂത്ത് നാളെ പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. വീഡിയോ കോൺഫറൻസിലൂടെയാകും പ്രധാനമന്ത്രി നരേന്ദ്രമോദി ഉദ്ഘാടനം ചെയ്യുന്നത്. സർവകലാശാല വൈസ് ചാൻസലർമാർ, ഇൻസ്റ്റിറ്റ്യൂട്ട് അധികൃതർ, അദ്ധ്യാപക-അനദ്ധ്യാപക ജീവനക്കാർ എന്നിവരെ അഭിസംബോധന ചെയ്ത് പ്രധാനമന്ത്രി സംസാരിക്കും.
രാജ്യത്തെ പ്രധാന പദ്ധതികളിൽ യുവജനങ്ങളുടെ സജീവ സാന്നിധ്യം ഉറപ്പുവരുത്തുക എന്നതാണ് വികസിത് ഭാരത് @2047: വോയ്സ് ഓഫ് യൂത്ത് എന്ന പരിപാടിയുടെ ലക്ഷ്യം. വികസിത ഇന്ത്യയിലേക്കുള്ള ചവിട്ടുപടിയായി പരിപാടി മാറുമെന്നും പിഎംഒയുടെ ഔദ്യോഗിക കുറിപ്പിൽ പറയുന്നു.
രാജ്യത്തെ പുരോഗതിയിലെത്തിക്കുന്നതിനായി യുവാക്കൾക്ക് നൽകാനുള്ള ആശയങ്ങളും നിർദ്ദേശങ്ങളും ഇതിലൂടെ പങ്കുവയ്‌ക്കപ്പെടുന്നതായിരിക്കും. 2047ഓടെ സ്വാതന്ത്ര്യത്തിന്റെ നൂറ് വർഷം ഇന്ത്യ ആഘോഷിക്കും. ഈ കാലയളവിനുള്ളിൽ ഭാരതത്തെ ഒരു വികസിത രാഷ്‌ട്രമാക്കി മാറ്റുക എന്നതാണ് ലക്ഷ്യം. ഇവയിൽ സാമ്പത്തിക വളർച്ച, സാമൂഹിക സാംസ്‌കാരിക പുരോഗതി, പാരിസ്ഥിതിക സുസ്ഥിരത എന്നിവയും ഉൾപ്പെടുന്നു.
